Bankterdiń táýelsiz dırektorlarynyń táýelsizdigine qosymsha talaptar engiziledi
ASTANA. KAZINFORM – Bankterdiń táýelsiz dırektorlarynyń táýelsizdigine qosymsha talaptar engiziledi. Bul týraly Májilistiń jalpy otyrysynda bank qyzmeti týraly zań jobasyn tanystyrǵan Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.
- Zań jobasynda táýelsiz dırektorlar sheshimderiniń obektıvtiligi men táýelsizdigin qamtamasyz etý úshin olardyń ınstıtýtyn kúsheıtý kózdeledi. Táýelsiz dırektorlardyń táýelsizdigine qosymsha talaptar engiziledi. Sondaı-aq dırektorlar keńesinde bolýdyń eń kóp merzimin 9 jyl dep belgileý kózdeledi, - dedi ol.
Sondaı-aq onyń aıtýynsha, halyqaralyq qarjylyq eseptilik standarttaryna sáıkes bankpen erekshe qatynastarmen baılanysty tulǵalardyń tizbesi keńeıtiledi.
- Ýájdi paıymdaý tetigin qoldaný keńeıtiledi. Táýekelder, ishki aýdıt jáne komplaens bólimsheleriniń basshylaryna qoıylatyn talaptar belgilenedi. Sonymen birge eskirgen jáne qaıtalanatyn normalar alyp tastaldy. Al barlyq qarjy uıymdarynyń aktsıonerleri men basshy qyzmetkerlerine qoıylatyn talaptar bir retke keltirilip, Qarjy naryǵyn memlekettik retteý týraly zańǵa aýystyrylady, - dedi Mádına Ábilqasymova.
Buǵan deıin el aýmaǵynda tsıfrlyq qarjy aktıvteriniń aınalymyna ruqsat berilýi múmkin ekenin jazǵan edik.