Bankterdiń nesıe qurylymy ınflıatsııaǵa qalaı áser etedi

ASTANA. KAZINFORM — Qazaqstandaǵy tutynýshylyq nesıe júıesi halyqqa qosymsha aýyrtpalyq túsirýde jáne ınflıatsııanyń ósýine áser etýde. Bul týraly Jibek Joly telearnasynyń «Ýáde» baǵdarlamasynda QR Parlamenti Májilisiniń depýtaty, «Respublica» partııasynyń tóraǵasy Aıdarbek Qojanazarov aıtty. 

Depýtattyń aıtýynsha, sońǵy 5–6 jylda bazalyq paıyzdyq stavka 13%-dan 18%-ǵa kóterilgen.

Bul ár ıpoteka nemese nesıe alýshyǵa jyl saıyn qosymsha tólem túsirýdi bildiredi. Mysaly, bes jylda qosymsha tólemder 25%-ǵa jetýi múmkin.

— Kóptegen adam tek Qosylǵan qun salyǵynyń ósýine nazar aýdarady (12%-dan 16%-ǵa), al bankterge tólenetin ústeme paıyzdar halyqqa áldeqaıda aýyrtpalyq túsiredi jáne ınflıatsııany arttyrady, — dedi depýtat.

Qazirgi ýaqytta bankterdiń nesıe portfeliniń 70%-y tutynýshylyq nesıege baǵyttalǵan.

Sarapshylardyń pikirinshe, bul qurylym kerisinshe bolýy tıis: 70%-y bızneske, 30%-y tutynýshyǵa berilýi kerek. Sol kezde jumys oryndary qarjylanyp, halyq qaryzǵa batpaıdy.

— Damyǵan elderde ulttyq bankter jumyspen qamtýdy qarjylandyrýǵa jaýapty. Qazaqstanda ulttyq bank tek ınflıatsııaǵa baqylaý jasaıdy. Sondyqtan qarjylandyrý qurylymyn ózgertý mańyzdy, — dedi Aıdarbek Qojanazarov.

Aıta keteıik, úsh kún buryn Qazaqstan Ulttyq bankiniń Aqsha-kredıt saıasaty komıteti bazalyq mólsherlemeni ±1 paıyzdyq tarmaq dálizimen jyldyq 18% deńgeıinde saqtaý týraly sheshim qabyldaǵan bolatyn.