Bankterdiń kredıt berý tártibi tekseriledi: 11 iri bank nazarǵa alyndy
ASTANA. KAZINFORM — Qazaqstannyń Qarjy naryǵyn retteý jáne damytý agenttigi ekinshi deńgeıdegi bankterdiń qaryz alýshylarynyń borysh júktemesi koeffıtsıentin (BJK) esepteý durystyǵyn tekserýge kiristi. Debt Service Review (DSR) dep atalatyn jańa qadaǵalaý protsesi 11 iri bankti qamtıdy.
Agenttik bul shara azamattardyń borysh júktemesin teńgerimdi deńgeıde ustap, jaýapty kredıtteý praktıkasyn nyǵaıtýǵa baǵyttalǵanyn habarlady.
Bólshek kredıtteý kóleminiń ósýine baılanysty bankterdiń qaryz berý týraly sheshim qabyldar aldynda azamattardyń tólem qabiletin obektıvti baǵalaýy mańyzdy. Osy maqsatta jańa qadaǵalaý protsesine deıin pılottyq joba júrgizilgen. Onyń barysynda Agenttik segiz banktegi BJK esebin taldady. Nátıjeler turaqty baqylaý tetigin engizý qajettigin kórsetti.
DSR protsesi halyqtyń shamadan tys kredıt alýyna jol bermeýge, qaryz alýshylardyń tabysy men kredıttik mindettemelerin durys baǵalaýǵa jáne bankterdiń kredıttik táýekelderin tómendetýge baǵyttalǵan.
Sonymen qatar Agenttik bank sektorynda BJK esepteýdiń biryńǵaı praktıkasyn qalyptastyryp, bankterdiń tólem qabiletin baǵalaý tásilderin jetildirýdi kózdeıdi. Bul ishki skorıngtik modelderdi ýaqtyly jańartýdy jáne kredıttik portfelderdiń sapasyn arttyrýdy qamtıdy.
Tekserý nátıjesinde Agenttik anyqtalǵan buzýshylyqtardyń sıpaty men mańyzdylyǵyn baǵalaıdy. Qajet bolǵan jaǵdaıda qadaǵalaý sharalaryn qoldaný jáne bankterdiń túzetý josparlaryn bekitý máselesi qaralady. Tekserý qorytyndylary BJK esepteý talaptaryn jetildirýge de negiz bolady.
BJK qaryz alýshynyń kredıtter boıynsha aı saıynǵy tólemderiniń ortasha aılyq tabysyna qatynasyn kórsetedi. Bul kórsetkish azamattardyń borysh júktemesin shekteýge arnalǵan negizgi retteýshi quraldardyń biri sanalady. Ony durys esepteý adamnyń burynǵy jáne jańa kredıtterin óteý múmkindigin obektıvti baǵalaýǵa múmkindik beredi.
Agenttik BJK-ny tómen baǵalaý bankterdiń kredıttik táýekelin jáne halyqtyń shamadan tys qaryzǵa batýy yqtımaldyǵyn arttyratynyn atap ótti.
Eske salaıyq, buǵan deıin Qazaqstanda AÁK taǵaıyndaǵanda azamattardyń kredıti men depozıti eskeriletinin habarlaǵan edik.
