Baýyrjan Ysqaqov: Bankterdiń qazirgi saıasaty — tutynýshylyq nesıe arqyly mol tabys tabý
ASTANA. KAZINFORM — Bankterdiń qazirgi nesıe saıasaty — ekonomıkany damytý emes, tutynýshylyq nesıe arqyly mol tabys tabý. Mundaı pikirdi ekonomıst Baýyrjan Ysqaqov aıtty.
«Prezıdenttiń osy jolǵy Joldaýynda bankter týraly jańa zań ázirleýdi tapsyrýy — óte oryndy bastama. Óıtkeni, dál qazirgi bankterdiń nesıe saıasaty, nesıe qorjynynyń qurylymy ekonomıkany damytýǵa emes, tutynýshylyq nesıeni neǵurlym kóp berý arqyly tabys tabýǵa baǵyttalǵanyn ashyq aıtýǵa negiz bar. Sol úshin jalpy álemdik tájirıbeni negizge ala otyryp, bankter týraly arnaýly zań qabyldanýy qajet. Ekonomıkaǵa qandaı banktik ónim tıimdilik, tabys ákelse, sonyń bárin qoldaýymyz kerek», — deıdi ekonomıst.
Osy oraıda sarapshy qarjy júıesinde ıslamdyq qarjylandyrý degen jaqsy baǵyttyń bar ekendigine nazar aýdartty.
«Onyń bizdegi damýy áli de bolsa kenjelep tur. Al kóptegen memleket bank týraly zańdarynyń arqasynda osy baǵytty keńinen qoldanyp, ekonomıkaǵa zor serpin beretindeı jaǵdaı jasap otyr. Buǵan qosa, bankterge qatysty zańnyń qabyldanýynyń ózi bizdegi kóptegen bankke qozǵalys ákeletin sııaqty. Óıtkeni, Memleket basshysy munyń aldyndaǵy tapsyrmalarynyń birinde „ekonomıkany nesıelendirýdi jedeldetpeıtin bolsa, belsendi jumys isteı almasa, onda sheteldik bankterdi tartý qıyndyq týǵyzbaıtynyn“ ashyq aıtqan edi. Demek, bul da — bankter úshin úlken belgi. Sondyqtan bankterdiń ekonomıkaǵa qarjy quıý mádenıetin, qaǵıdasyn arttyrýdyń tıimdi ári tóte joly — bankter týraly arnaýly zań qabyldaý. Sonyń nátıjesinde ekonomıkany belsendi nesıelendiretin bank júıesin qalyptastyrýymyz qajet», — dedi Baýyrjan Ysqaqov.
Aıta keteıik, keshe Memleket basshysy Qazaqstan halqyna joldaǵan Joldaýynda bankter týraly jańa zań qajet ekenin aıtqan bolatyn.
