Bankterdiń bıznesti kredıtteýin odan ári keńeıtý baǵytyndaǵy jumys jalǵasady — Ulttyq bank
ASTANA. KAZINFORM — Ulttyq bank bankterdiń bıznesti kredıtteýin odan ári keńeıtý baǵytyndaǵy jumysyn jalǵastyrady.
— Ulttyq bank pen Qarjy naryǵyn retteý jáne damytý agenttigi Úkimetpen birlesip, ekonomıkanyń naqty sektoryn, sonyń ishinde shaǵyn jáne orta bıznesti kredıtteýdi keńeıtý baǵytynda jumys isteýdi jalǵastyryp keledi. Osy baǵytta buǵan deıin de birqatar fıskaldyq sharalar qabyldanǵan bolatyn. Atap aıtqanda, bankterdiń tabysyna salynatyn korporatıvtik tabys salyǵynyń saralanǵan mólsherlemeleri engizildi. 2026 jyldan bastap bıznesti kredıtteýden túsetin tabysqa 20% mólsherleme, al ózge qyzmet túrlerinen túsetin tabysqa 25% mólsherleme qoldanylady. Sonymen qatar bankterdiń memlekettik baǵaly qaǵazdardan túsetin tabysyna salyq salý tetigi engizildi. Bul — kredıt jáne ınvestıtsııa qyzmeti arasyndaǵy salyq teńsizdigin joıýǵa baǵyttalǵan qadam, — dep atap ótedi qarjy retteýshisi.
Ulttyq bank málimetinshe, budan bólek, bankterdiń shaǵyn jáne orta bıznes jobalaryna kredıt bergende, sondaı-aq iri jobalardy sındıkattalǵan qarjylandyrýǵa qatysqanda kapıtalǵa túsetin júktemeni azaıtýǵa jol ashatyn jańa retteý sharalary qabyldandy.
— 2025 jyly Úkimet eki kepildik qoryn qurdy. Bul bankterge kepilzat usyna almaıtyn qaryz alýshylarǵa da kredıt berýge múmkindik beredi. Jalpy, qabyldanǵan sharalar bankterdi ekonomıkanyń naqty sektoryn qarjylandyrýǵa belsendi tartýdy jáne olardyń kapıtalyn tıimdi paıdalanýǵa jaǵdaı jasaýdy kózdeıdi. Sonymen birge Ulttyq bank Úkimetpen jáne agenttikpen birlesip, bank kredıtteýin odan ári keńeıtý baǵytyndaǵy jumysyn jalǵastyra beredi, — dedi elimizdiń ortalyq banki.
Osy jyldyń aqpanynda ótken Úkimet otyrysynda Memleket basshysy Qasym-Jomart Toqaev Qarjy naryǵyn retteý jáne damytý agenttigi men Ulttyq bankke 1 qyrkúıekke deıin saqtandyrý jáne qor naryǵyn damytýdyń 2030 jylǵa deıingi baǵdarlamasyn ázirleýdi tapsyrǵan edi.
