Bankterdiń zańsyz komıssııasy: Kelisimsharttyń tili - kúrdeli, al áripteri - usaq

ASTANA. QazAqparat - Sotqa ekinshi deńgeıli bankterdiń zańsyz komıssııalaryna qatysty aryz-shaǵymdar kóptep túsýde, dep xabarlaıdy QazAqparat tilshisi.

QR Joǵarǵy sotynyń sýdıasy Aqyltaı Kasımovtyń aıtýynsha, respýblıka boıynsha bankterdiń jumysyna qatysty qarapaıym azamattar da, kásipkerler de jıi aryzdanady.

«Máselen, nesıe boıynsha qyzmet kórsetý komıssııasyn qaıda jáne qalaı jazǵanyn bilmeı qalasyń. Zaem týraly kelisimshartty alyp oqysańyz, eshteńe túsinbeısiz. Tili kúrdeli, al áripteri usaq. Basynan bastap aıaǵyna deıin oqyp shyqsań da, máseleniń mánisine jete almaısyń. Sonda naqty qandaı protsent bolady? Qansha tóleý kerek? Ony anyqtaý múmkin emes», - dedi A.Kasımov «Atameken» UKP Sybaılas jemqorlyqqa qarsy kúres jónindegi keńestiń búgingi otyrysynda.

Sýdıanyń sózine qaraǵanda, sotqa túsken materıaldardyń ishinde naqty mysaldar da bar. Adam bankten aqshany alǵannan keıin ony áldeqaıda kóp mólsherde qaıtarýǵa májbúr. Sebebi ishinde protsent, komıssııa jáne taǵy basqa aqylar bar.

«Qazir Joǵarǵy sotqa sol komıssııalarǵa qatysty aryz-shaǵymdar kóptep túsýde. Osyǵan baılanysty «Bank jáne bank qyzmeti týraly» zańnyń 36-babyna ózgeris engizý jóninde usynys jasaldy. Sol jerde naqty qandaı komıssııalar zańdy ekenin anyqtap jazý qajet», - dep atap kórsetti A.Kasımov.

Aıta keteıik, keńestiń búgingi otyrysynda kásipkerler arasyndaǵy kelisimsharttardy oryndaý máselesi qaraldy. Búginde «Atameken» palatasyna túsetin aryzdar ishinde bıznesmender arasyndaǵy daýlarǵa qatysty shaǵymdar az emes. Olar bir-birine aqsha tólemeıdi. Tipti, seriktestik kelisimin rásimdese de, alaıaqtyq jolmen áriptestiń múlkin urlaý faktileri de bar. Qazaqstan kásipkerleriniń quqyqtaryn qorǵaý jónindegi ýákil Bolat Palymbetovtyń sózine qaraǵanda, kásipkerlerdiń kelisimshart mindetterin oryndaı almaýyna memlekettik organdar da kináli. Olar aqshany ýaqytynda bermeıdi. Sodan bıznesmender óz áriptesterine aqshany tóleı almaı júredi.

«Máselen, bıznesmen tenderdi utyp alady. Al memlekettik organ oǵan aqshany tólemeı qoıdy. Sodan búkil tizbek kete beredi. Kásipker óz áriptesine aqsha bere almaıdy. Solaı ary qaraı ketedi», -  deıdi B.Palymbetov.

Osy oraıda «Atameken» UKP basqarma tóraǵasynyń orynbasary Rýstam Júrsinov mańyzdy bir máseleni eske saldy.

«Bizde memlekettik organdardyń birinshi basshysy aýyssa, birden barlyq kelisimsharttar joıylady. Ákim, mınıstr bolsyn, kelisimsharttardy birden buza salady. Óte qyzyqty úrdis...», - deıdi R.Júrsinov.