Bankterdiń valıýtalyq operatsııalarǵa qyzmet kórsetý merzimderi qysqarady

ASTANA. QazAqparat - Bankterdiń valıýtalyq operatsııalar boıynsha tólemderge qyzmet kórsetý merzimderi qysqarady. Bul týraly Májilistiń jalpy otyrysynda «Valıýtalyq retteý jáne valıýtalyq baqylaý týraly» zań jobasy boıynsha baıandama jasaǵan QR Ulttyq bankiniń tóraǵasy Danııar Aqyshev málim etti, dep habarlaıdy QazAqparat.

Transshekaralyq valıýtalyq operatsııalardyń qamtylýyn keńeıtý máselesine toqtalǵan UB basshysy, «Zań jobasynda valıýtalyq operatsııalar týraly aqparat jınaý rásimderin jeńildete otyryp, olardy barynsha tolyq qamtý kózdeledi. Tirkeýdiń jáne habarlaýdyń kúrdeli rejimderiniń kúshi joıylady. Olardyń ornyna valıýtalyq sharttardy biryńǵaı eseptik tirkeý engiziledi.   Sharttyń somasy men nysanasy eseptik tirkeý úshin ólshemshart bolady. Osyndaı jaǵdaılarda bankter valıýtalyq operatsııaǵa qatysty tirkeý nemese habarlaý rejimin qoldaný kerektigin anyqtaýy qajet bolmaıdy. Sondyqtan bankterdiń valıýtalyq operatsııalar boıynsha tólemderge qyzmet kórsetý merzimderi qysqarady», - dep atap ótti D. Aqyshev.

Onyń sózine qaraǵanda, zań jobasyna sáıkes, taýarlar men kórsetiletin qyzmetterdiń eksporty men ımporty boıynsha sharttarǵa eseptik tirkeý rásimi qoldanylady. Bul valıýtalyq baqylaýdyń tıimdiligin arttyrý jáne valıýtalyq túsimdi elge qaıtarý úshin kelisimsharttardyń tolyq qamtylýyn qamtamasyz etedi.

Budan buryn habarlanǵandaı, jalpy otyrys barysynda Ulttyq bank tóraǵasy Qazaqstandaǵy sheteldik uıym fılıaldarynyń esep aıyrysýlaryn teńgege aýystyrýdy usyndy.