Bankterdiń turaqtylyǵyn qamtamasyz etý jumystary jalǵasady - Danııar Aqyshev

ASTANA. QazAqparat - QR Ulttyq banki bankterdi qalpyna keltirý jáne turaqtylyǵyn qamtamasyz etý jumysyn jalǵastyrady. Bul týraly búgin Úkimettiń selektorlyq rejimdegi otyrysynda QR Ulttyq banki tóraǵasy Danııar Aqyshev aıtty, dep habarlaıdy QazAqparat tilshisi.

«Ulttyq bank munaı baǵasy tómendegen kezde Qazaqstan Respýblıkasynyń 2019 - 2023 jyldarǵa arnalǵan áleýmettik-ekonomıkalyq damý boljamdaryna ózgeristerdi qoldaıdy.  Bul rette, boljamdaǵy teńgeniń aıyrbastaý baǵamynyń esep aıyrysý máni biz úshin baǵdar emes. Ulttyq banki ózgermeli aıyrbastaý baǵamy rejımin saqtaıdy», - dep túsindirdi ol.

D.Aqyshevtiń aıtýynsha, Ulttyq banktiń ınflıatsııa boıynsha ortamerzimdi maqsaty 4 paıyzǵa jýyq deńgeı bolyp qalady.

«Ekonomıkadaǵy ınflıatsııalyq aıa joǵary bolyp qalýda. Inflıatsııanyń 2019 jyldyń dálizinen tys 4-6 paıyz shyǵý táýekeli saqtalýda. Inflıatsııanyń ósýin boldyrmaý úshin aqsha-kredıt saıasatyn odan ári qatańdatýǵa bolady. Sonymen qatar bazalyq mólsherleme naqty kórsetýde ekonomıkanyń uzaq merzimdi ósý qarqynynan aspaıdy», - dedi UB tóraǵasy.

Ol Qazaqstan Ulttyq banki bankterdi qalypqa keltirý jáne turaqtylyǵyn qamtamasyz etý boıynsha júıeli jumysty jalǵastyra beretindigin de aıtty.

«Bul sharalar  «7-20-25» baǵdarlamasyn iske asyrý jáne bankterge 600 mlrd teńge sheginde ótimdilik berý bankterdiń kredıttik belsendiliginiń ósýine yqpal etedi», - dedi  D.Aqyshev.