Bankterdiń turaqty qorlandyrý koeffıtsıentin qatańdatý kelesi jylǵa qaldy
«2023 jylǵy 1 qańtarǵa deıin zańdy tulǵalardyń depozıtterin merziminen buryn alý múmkindigimen qoljetimdi turaqty qorlandyrý esebine qosý arqyly netto turaqty qorlandyrý koeffıtsıentin (NSFR) odan ári qatańdatý merzimi aýystyryldy» delingen Úkimet basshysynyń jaýabynda.
Onyń aıtýynsha, geosaıası jaǵdaıdyń shıelenisýine baılanysty táýekelderdi sezdirmeý jáne olardyń bankterdiń prýdentsııalyq normatıvterdi oryndaýyna yqpalyn álsiretý úshin Úkimet Qarjy naryǵyn retteý jáne damytý agenttigimen birlesip basqa da naqty sharalar qabyldap jatyr.
«2022 jylǵy 1 maýsymǵa deıin bankter prýdentsııalyq normatıvter talaptaryn ózderine táýelsiz mán-jaılar (klıentterdiń aqsha qarajatynyń ketýi, teńgeniń aıyrbas baǵamynyń ózgerýine, mindettemelerdiń valıýtalyq qurylymynyń ózgerýine baılanysty aktıvter men mindettemelerdiń qunyn qaıta baǵalaý) saldarynan buzǵan kezde olardy saqtaýdyń erekshe tártibi engizildi. 2022 jylǵy 1 qyrkúıekke deıin sheteldik bas bankterdiń óz qarajaty esebinen ózderiniń Qazaqstandaǵy enshiles qurylymdarynyń ótimdiligin nyǵaıtý múmkindigine qoldaý kórsetý maqsatynda eldiń beırezıdentteri aldyndaǵy mindettemelerge qatysty banktiń kapıtaldandyrý normatıvin oryndaý kezinde enshiles bankterdiń mindettemelerin esepteýde bas bankterden alynǵan depozıtter men kredıtter somasy alyp tastaldy», - deıdi Álıhan Smaıylov.
Premer-Mınıstrdiń paıymynsha, kapıtal men joǵary ótimdi aktıvter qory Qazaqstanda jumys istep jatqan bankterge qarjy naryǵyndaǵy keleńsizdikterdi eńserýge múmkindik beredi.
«Bank júıesiniń yqtımal strestik stsenarııler men keleńsizdikterge turaqtylyǵy dárejesin baǵalaý úshin táýekelge baǵdarlanǵan qadaǵalaý quraldaryn keńeıtý jumysy jalǵasyp jatyr. Atap aıtqanda, yqtımal keleńsizdikterdiń paıda bolýyn baǵalaý úshin turaqty AQR jáne qadaǵalaý stress-testileý júıesi ázirlenip, engizildi jáne tájirıbede synaldy. Qazaqstannyń bank sektorynyń menshikti kapıtaly - 4,6 trln teńge. Ekinshi deńgeıdegi bankterdiń shamamen 11,6 trln teńgeni nemese aktıvterdiń 31,3%-yn quraıtyn ótimdiligi joǵary aktıvter qory bar», - dep jazylǵan jaýapta.
Eske salsaq, QR Premer-Mınıstri Álıhan Smaıylov Májilis ókilderiniń depýtattyq saýalyna joldaǵan jaýabynda Reseıde qalyp qoıǵan taýarlar Eýropaǵa qalaı shyǵarylatynyn aıtty.
