Bankterdiń naýryz aıyndaǵy tutyný maqsatynda bergen nesıeleri mıllıard dollardan asyp túsken
ASTANA. QazAqparat - Bankterdiń naýryz aıyndaǵy tutyný maqsatynda bergen nesıeleri mıllıard dollardan asyp tústi, dep habarlaıdy Ranking.kz portaly.
«Jazǵy maýsym qarsańynda tutyný sektorynyń belsendiligi arta tústi. Bankterdiń naýryz aıyndaǵy tutyný maqsatynda bergen nesıeleri mıllıard dollardan asyp túsken. Byltyrǵy jyldaǵy tutyný nesıeleriniń sharyqtaýy shilde aıyna kelgen bolatyn. Ol kezdegi berilgen tutyný nesıeleriniń somasy 1,3 mıllıard dollar boldy. Naýryz aıynyń qorytyndysy boıynsha, halqymyzdyń tutyný maqsatynda alynǵan nesıeler boıynsha bankter aldyndaǵy bereshegi 2,3 trıllıon teńgeden asqan», - delingen habarlamada.
Derekter boıynsha, eń joǵarǵy suranys Almatyda. Bundaǵy suranys bir aı ishinde 5%-ǵa ósip, 942 mıllıard teńgege jetken. Bul soma, QR EDB tutyný maqsatynda berilgen nesıeleriniń 40%-ǵa jýyǵyn quraıdy.
