Bankterdiń kredıttik belsendiligi qalypty deńgeıde - D. Aqyshev

ASTANA. QazAqparat - Qyrkúıektiń qorytyndysy boıynsha ekonomıkaǵa kredıtter ótken jylǵy jeltoqsandaǵy deńgeıde qalyp otyr, ıaǵnı 12,7 trln teńge. Degenmen, jekelegen sektorlarda: óńdeýshi ónerkásipte, aýylsharýashylyǵynda jáne qurylysta kredıttik portfeldiń óskendigi baıqalyp otyr. Bul jóninde QR Ulttyq Bankiniń tóraǵasy Danııar Aqyshev «Altaı Invest-2016» Halyqaralyq ınvestıtsııalyq forýmynda málim etti.

«Shaǵyn jáne orta bıznes sýbektilerin damytýdy yntalandyrý jáne turǵyn úıdiń qoljetimdiligin qamtamasyz etý úshin menshikti kapıtal jetkiliktiligine qoıylatyn talaptar tómendetildi, sondaı-aq memlekettik qoldaýdyń aýqymdy baǵdarlamalary iske asyrylýda», - dep atap ótti D. Aqyshev. Ol Ulttyq Banktiń 2016 jylǵy 9 aıdaǵy 738 mlrd teńgege nemese 2,8 trln teńgege deıin 36%-ǵa ulǵaıǵan shaǵyn kásipkerlik sýbektilerin kredıtteý jónindegi derekterdi keltirdi.

«Ulttyq Bank makroekonomıkalyq jaǵdaılardy jasaý jónindegi sharalardy iske asyrýdy jalǵastyrady, bankter olar boıynsha teńgemen uzaqmerzimdi kredıtter bere alady», - dep tolyqtyrdy Ulttyq Bank tóraǵasy.

Sondaı-aq ol qarjylandyrýdyń balama arnasy qurý sheńberinde QR UB-nyń baǵaly qaǵazdar naryǵyn reformalaý boıynsha keshendi sharalardy iske asyrýdy josparlap otyrǵanyn aıtty. «Aldaǵy qor naryǵyn qaıta iske qosý ekonomıkanyń naqty sektorynyń barlyq sýbektileri úshin naryqtyq jaǵdaıda qorlandyrýdyń ornyqty bazasyn ártaraptandyrýǵa aıtarlyqtaı úlesin qosýǵa múmkindik beredi. Biz qazirgi kezde qor bırjasynda aqsha tartýǵa daıyn kásiporyndardyń jáne eń bastysy osyndaı quraldar qyzyqtyratyn jáne olardy qajet etetin ınvestorlardyń aıtarlyqtaı jandanǵanyn kórip otyrmyz», - dep qorytyndylady D. Aqyshev.