Bankterdiń ekonomıkany kredıtteýi bıyl 10 paıyzǵa deıin ósetin bolady- G. Marchenko
ALMATY. 9 aqpan. QazAqparat /Erlik Erjanuly/ - Bankterdiń ekonomıkany kredıtteýi byltyr aldyńǵy jylmen salystyrǵanda 0,6 paıyzǵa tómendedi. Ony Ulttyq bank tóraǵasy búgin Almatyda ótken baspasóz máslıhatynda aıtty.
"Bankterdiń ekonomıkany kredıtteýi bıyl 10 paıyzǵa deıin ósedi dep boljanyp otyr. Mundaı boljam ótken jyly da jasalǵan bolatyn. Alaıda ol aldyńǵy jylmen salystyrǵanda ósýdiń ornyna 0,6 paıyzǵa deıin tómendep ketti. Úkimet usynǵan zaemshylardy sýbsıdııalaý mólsherlemesi, shaǵyn jáne orta bıznes zaemshylary qaryzynyń negizgi somasynyń 50 paıyzyn kepildendirýdiń yqpaly ázirge shekteýli bolyp otyr", - deıdi G. Marchenko.
Onyń aıtýynsha, qazir Úkimette bankterdiń ekonomıkany yntalandyrýynyń taǵy birqatar tetikteri talqylanýda. Sondaı-aq 2010 jyly bankterdiń balansyna provızııa jasaldy. Bul da olardy yntalandyrmaq.
Ulttyq valıýtadaǵy kredıtterdiń kólemi byltyr 11,1 paıyzǵa artyp, shetel valıýtasynda 13,1 paıyzǵa tómendedi. Jeltoqsanda teńgedegi kredıtterdiń úlesi qarashamen salystyrǵanda 56,8-den 57,7 paıyzǵa deıin ulǵaıdy. Banktik emes zańdy tulǵalarǵa ulttyq valıýtamen berilgen kredıtter boıynsha ortasha alynǵan syıaqy mólsherlemesi 12,9 paıyz, jeke tulǵalarda 20,3 paıyz boldy.
