Bankterdiń ekonomıkany kredıtteý kólemi jyl basynan beri 2,2%-ǵa ósti - QR Ulttyq banki
ALMATY. QazAqparat - Qazaqstanda ekinshi dárejeli bankterdiń ekonomıkany kredıtteý kólemi jyl basynan beri 2,2%-ǵa ósti. Bul týraly búgin QR Ulttyq bankiniń baspasóz qyzmetinen habarlady.
«Bankterdiń ekonomıkany kredıtteý kólemi bir aıda 3,4%-ǵa ósip (jyldyń basynan 2,2%-ǵa ósti), 2015 jylǵy qarashanyń sońynda 12 368,6 mlrd. teńge boldy.
Al ulttyq valıýtadaǵy kredıtterdiń kólemi 8 485,4 mlrd. teńge (jyldyń basynan 0,9%-ǵa tómendedi), shetel valıýtasymen - 3 883,2 mlrd. teńge (jyldyń basynan 9,7%-ǵa ósti) boldy», delingen Ulttyq banktiń jarııalaǵan málimdemesinde.
Teńgemen berilgen kredıtterdiń úles salmaǵy bıyl 68,6 paıyzǵa jetken.
Uzaq merzimdi kredıtteý kólemi 2015 jylǵy qarashanyń sońynda bir aıda 3,0%-ǵa, qysqa merzimdi nesıeler - 2 281,2 mlrd. teńgege (bir aıda 5,0%-ǵa ósti) ulǵaıyp, 10 087,3 mlrd. teńge boldy. Zańdy tulǵalarǵa beriletin kredıtterdiń kólemi 2015 jylǵy qarashanyń sońynda 8 180,0 mlrd. teńgege deıin, ıaǵnı 5,2%-ǵa ulǵaısa, jeke tulǵalarǵa berilgen kredıtter 4 188,6 mlrd. teńgege deıin, ıaǵnı 0,1%-ǵa ulǵaıdy. Jeke tulǵalarǵa berilgen kredıtterdiń úles salmaǵy 33,9 paıyzdy qurap otyr.
Sonymen qatar elimizde shaǵyn kásipkerlik sýbektilerin kredıtteý bir aıda 3,0%-ǵa ulǵaıyp, 2015 jylǵy qarashanyń sońynda 1 940,1 mlrd. teńge boldy, bul ekonomıkadaǵy kredıtterdiń jalpy kóleminiń 15,7%-yn quraıdy.
Salalar boıynsha bankter bergen nesıelerdiń aıtarlyqtaı somasy saýda (jalpy kólemindegi úlesi 20,6%), ónerkásip (13,4%), qurylys (8,0%), aýyl sharýashylyǵy (4,9%) jáne kólik (4,5%) sııaqty salalarǵa tıesili boldy.
Al syıaqy mólsherlemesine keler bolsaq, 2015 jylǵy qarashada banktik emes zańdy tulǵalarǵa ulttyq valıýtamen berilgen kredıtter boıynsha syıaqynyń ortasha alynǵan mólsherlemesi 15,7% (2015 jylǵy qazanda - 14,8%), jeke tulǵalardiki - 17,2% (16,7%) boldy.
