Bankterde problemalyq qaryzdar kóbeıip barady – Esep komıteti
NUR-SULTAN. QazAqparat – Respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Natalıa Godýnova el ekonomıkasyndaǵy bank sektorynyń róli tómendep bara jatqanyn málim etti, dep habarlaıdy QazAqparat tilshisi.
«Ómir sapasy basym jaǵdaıda nesıeleý esebinen qamtamasyz etilip otyr. 2019 jyly tutynýshylyq nesıe halyqtyń nomınaldy tabysynyń ósiminen shamamen 15 paıyzǵa basyp ozdy. Al nesıe ala berýdiń saldary áleýmettik problemalardy týyndatady. Memleket tarapynan aıtarlyqtaı kómektiń bolǵanyna qaramastan, keıingi bes jylda el ekonomıkasyndaǵy bank sektorynyń róli tómendep barady. JІÓ-degi onyń aktıvteri 40 paıyzǵa deıin azaıdy. 2015 jyly bul kórsetkish 60 paıyzǵa teń edi. JІÓ-men eseptegende bankterdiń qaryz beretin portfeli eki ese qysqardy. Problemalyq qaryzdar artyp barady», - dedi Natalıa Godýnova Parlament Senatynda 2019 jylǵy respýblıkalyq bıýdjettiń atqarylýy týraly esepti baıandaý kezinde.
Onyń aıtýynsha, bıznes úshin qoljetimdi aqsha berý máselesi áli de rettelmeı keledi.
«Memlekettik qaryz, sol sekildi Úkimettiń qaryzy qaýipsiz shekte tur. Degenmen, shyǵyndar da artyp keledi. Úkimettik qaryzdyń bul baǵyttaǵy shyǵyny 1,4 trln teńgege jetti. Degenmen, halyqaralyq qarjy uıymdarynan memlekettik-jekeshelik áriptestik, kvazımemlekettik sektor men jergilikti atqarýshy organdar boıynsha qaryz alý jumystaryn júıege keltirdik», - dedi ol.
