Bankter úshin esep berýdiń biryńǵaı qaǵıdasy engiziledi

ASTANA. KAZINFORM – Ekinshi deńgeıdegi bankter, rezıdent emes bank fılıaldary jáne Qazaqstannyń damý bankiniń esepti usyný qaǵıdasy jańartyldy. Qujat jobasy «Ashyq NQA» portalynda jarııalandy. 

Ulttyq bank ázirlegen qaýly jobasynda elimizdegi ekinshi deńgeıdegi bankterdiń, Qazaqstanda rezıdent emes bank fılıaldarynyń, Qazaqstan damý bankiniń esep usynýdyń biryńǵaı qaǵıdasymen qosa, ákimshilik derekti jınaý erejesin bekitý usynylyp otyr.

Osylaısha, esepti usynýǵa qatysty birtektes jáne ózara baılanysty máseleni retteıtin Ulttyq banktiń 2020 jylǵy 21 sáýirdegi №54 qaýlysy, 2021 jylǵy 2 naýryzdaǵy №22 qaýlysy jáne 2018 jylǵy 29 maýsymdaǵy №139 qaýlysy biriktirildi. Jańa qaǵıda bekitilgennen keıin atalǵan qaýlylardyń kúshi joıylady.

Aıta ketetin jaıt, ekinshi deńgeıdegi bankter, Qazaqstanda rezıdent emes bank fılıaldary jáne Qazaqstannyń damý bankiniń eseptilik nysandary jáne olardy usyný tártibi ózgermeıdi.

Qujat jobasy 2025 jylǵy 6 tamyzǵa deıin qoǵamdyq talqylaýǵa usynyp otyr.

Eske sala ketsek, Ulttyq bank ınflıatsııamen kúreste birqatar shara qabyldady.