Bankter týraly zań jobasy: ıslamdyq qarjylandyrý nazarǵa alynady
ASTANA. KAZINFORM – Jańa zań jobasy aıasynda bankter úshin ıslamdyq qarjylandyrý qaǵıdattary boıynsha qyzmet kórsetý múmkindigi qarastyrylǵan. Bul týraly Májilis tóraǵasynyń orynbasary Danııa Espaeva málim etti.
- Bank lıtsenzııalarynyń túrlerin saralaý básekelestikti arttyrýda mańyzdy faktor sanalady. Qazirgi kezde retteýshi talaptar barlyq bankter úshin biryńǵaı. Zań jobasynda talaptary az bazalyq bank lıtsenzııasyn engizý usynylady, bul jańa sýbektilerdiń naryqqa kirýine kedergilerdi azaıtýǵa múmkindik beredi. Sondaı-aq, básekelestikti arttyrý úshin ıslamdyq qarjylandyrýdy damytý qajet. Búginde Qazaqstanda eki ıslam banki jumys isteıdi («ADCB» Islam Banki» AQ jáne «Zaman bank» Islam Banki» AQ). Qaralyp otyrǵan zań jobasy aıasynda bizdiń bankter úshin ıslamdyq qarjylandyrý qaǵıdattary boıynsha qyzmetter kórsetý múmkindigi kózdeledi, - dedi D. Espaeva Parlament Májisinde bank qyzmeti týraly zań jobasynyń tanystyrylymy kezinde
Onyń aıtýynsha, qazirgi bankter men qarjy uıymdary óz jumysynda basshylyqqa alatyn qoldanystaǵy zań 30 jyl buryn qabyldanǵan. Ol kezde qarjy salasyna tsıfrlyq tehnologııalar endi ǵana engizile bastaǵanyn túsingen jón. Qazir bankter qyzmet tıimdiligin arttyrý jáne qarjylyq qyzmetter usyný úshin jańa tehnologııalardy belsendi túrde engizip, oǵan qomaqty qarajat salyp jatyr.
- Osyǵan baılanysty bankterge qarjyny fınteh-kompanııalarǵa ınvestıtsııalaý múmkindigi beriledi, bul ınnovatsııalyq fınteh-ónimder men servıster qurýǵa jol ashady. Sonymen qatar, zań jobasynda Tsıfrlyq teńgeni belsendi damytý, ıfrlyq qarjy aktıvteriniń aınalymy úshin ınfraqurylym qurý, krıpto aıyrbastaǵyshtardy damytý kózdelgen. Alaıda, tsıfrlyq tehnologııalardy engizý azamattarymyzdy qorǵaý máselelerine basa nazar aýdarýdy qajet etedi. Banktik qyzmetterdi tsıfrlandyrý arqyly kredıt alý múmkindigi edáýir jeńildep, jedel berile bastady. Biraq sonymen birge bul ınternet-alaıaqtyqtyń órshýine sebep boldy.
Osyǵan baılanysty, depýtattarǵa zań jobasyn qaraý kezinde qarjylyq qyzmetterdi, tutynýshylardy qorǵaý tetikterin kúsheıtý jáne olardyń derbes derekterin qorǵaý sharalaryna erekshe nazar aýdarý qajet, - dedi depýtat.
Eske salsaq, bıylǵy Joldaýda Memleket basshysy Qasym-Jomart Toqaev bankter týraly zańdy 2025 jyldyń aıaǵyna deıin qabyldaý kerek ekenin atap ótti.