Bankter sheteldik ınternet-kompanııalarǵa qazaqstandyqtardyń aýdarymdary týraly aqparat berýge mindetteledi

NUR-SULTAN. QazAqparat – Qazaqstanda salyq tóleýshiniń pasporty engizilmek. Bul týraly Májilis depýtaty Sergeı Sımonov aıtty, dep habarlaıdy QazAqparat tilshisi.

Bul qadamdar «Salyq jáne bıýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» zań jobasynda qamtylǵan.

«Kóleńkeli ekonomıkaǵa qarsy is-qımylǵa baǵyttalǵan salyqty ákimshilendirýdi jetildirý maqsatynda Eýrazııalyq ekonomıkalyq odaqtyń kedendik aýmaǵyna ákelingen taýarlardyń qadaǵalaný tetigi týraly kelisimniń normalaryn ulttyq salyq zańnamasyna ımplementatsııalaý usynylady», - dedi depýtat Sergeı Sımonov Májilistiń jalpy otyrysynda.

Sonymen qatar mobıldik tólemderdi retteý eskerilgen.

Munymen qosa qujatta:

- ekinshi deńgeıdegi bankter men tólem uıymdarynyń memlekettik kirister organdaryna sheteldik ınternet-kompanııalardyń qosylǵan qun salyǵyn («Google»-ge salynatyn salyq) tolyq jáne ýaqtyly tóleýin qamtamasyz etý maqsatynda «Merchent ID» boıynsha sheteldik ınternet-kompanııalardyń paıdasyna jeke tulǵalar júzege asyrǵan tólemder men aýdarymdardyń somalary týraly aqparatty berý jónindegi mindetin kózdeý;

- salyq tóleýshiniń pasportyn engizý;

– 2023 jylǵy 1 qańtardan bastap arnaıy salyqtyq rejımderdi (ASR) jáne biryńǵaı jıyntyq tólemdi qoldaný úshin ruqsat etilgen qyzmet túrlerin qaıta qaraý qamtylǵan.

Budan buryn habarlanǵandaı, jalpy otyrysta «Salyq jáne bıýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» zań jobasy birinshi oqylymda maquldandy.