Bankter óz qoryn aldyn ala qalyptastyrýy tıis — Qojanazarov

ASTANA. KAZINFORM — 2025 jyly bank sektory úshin mańyzdy ózgerister engizildi. Bankterdiń negizgi qyzmeti tutynýshylyq nesıe berýge baǵyttalǵandyqtan, naqty ekonomıkaǵa áseri tómen. Osy sebepti tabys salyǵyna jańa tásil — dıfferentsıaldy salyq engizildi. Bul týraly Parlament Májilisiniń depýtaty Aıdarbek Qojanazarov Jibek Joly telearnasynyń «Ýáde» baǵdarlamasynda aıtty. 

Endi eger bank tek tutynýshylyq nesıe nemese naqty sektorǵa qatysy joq jobalardan paıda alsa, salyq mólsheri 25 paıyz bolady. Bastapqyda 30 paıyz usynylǵanymen, Ulttyq bank ony 25 paıyzǵa bekitti. Burynǵy 20 paıyzdyq mólsherleme 25 paıyzǵa kóterilgen.

— Bul ózgeris bankterdi naqty sektorǵa nesıe berýge yntalandyrady, al shaǵyn jáne orta bıznes úshin jaǵdaı salystyrmaly túrde jeńildeıdi, — dedi depýtat.

Sonymen qatar, bankterdiń óz qorlaryn aldyn ala qalyptastyrý normasy da engizildi. Qarajat jetkiliksiz bolsa, bank qıyn jaǵdaıda bankrot bolýy múmkin. Bir qaraǵanda salyq pen qor normasy baılanyssyz sııaqty kórinse de, olar birtutas júıe retinde bankterdiń táýekelin basqarýǵa jáne tutynýshylardyń quqyqtaryn qorǵaýǵa yqpal etedi.

— Eger nesıe adam qatysýynsyz rásimdelse, jaýapkershilik tek bankke júkteledi. Al aldyn ala qor bolmasa, bank qaýqarsyz zańdy tulǵa bolyp esepteledi. Bul normanyń tıimdiligin ýaqyt kórsetedi, — dedi depýtat.

Eske salsaq, onlaın kredıt alýdyń jańa tártibi bekitildi. Endi bank pen mıkroqarjy uıymdarynan onlaın kredıt alý úshin bıometrııalyq tekserýden ótý mindetti.