Bankter nesıe mólsherlemesin qashan tómendetedi
ASTANA. KAZINFORM — Ulttyq bank tóraǵasy Tımýr Súleımenov nesıe boıynsha paıyzdyq mólsherlemeler tómendeýi múmkin ekenin málimdedi.
Bul elordada ótken baspasóz máslıhatynda bazalyq mólsherlemeniń tómendegenine qaramastan, bankterdiń nesıe boıynsha joǵary paıyzdyq mólsherlemelerdi nelikten saqtap otyrǵany jáne Ulttyq banktiń bul jaǵdaıǵa yqpal etýi múmkindigi jóninde suraldy.
Tımýr Súleımenov aqsha-nesıe saıasaty men bazalyq mólsherlemeniń ekonomıkaǵa belgili bir ýaqytsha kidirispen áser etetinin atap ótti. Ulttyq banktiń mólsherlemeni tómendetýi kommertsııalyq bankterdiń nesıe sharttaryn birden qaıta qaraı bastaıtynyn bildirmeıdi.
— Belgili bir ýaqyt ótkennen keıin, olar kelisimderdi qaıta qaraı bastaıdy. Ekinshi tarap: «Biz bastapqyda bul qarjylandyrýdy 17%-ben alǵan edik, biraq qazir mólsherlemeler tómendedi. Sondyqtan ony 15% nemese 16%-ǵa deıin ózgertsek qaıtedi?» – dep ótinim bildirýi múmkin. Alaıda, kelisim óz kúshinde bolǵan kezde, onda kórsetilgen mólsherlemeler qoldanyla beredi. Nátıjesinde, belgili bir ýaqyt aralyǵynda atalǵan kidiris merzimi bar, ıaǵnı 9 aıdan 12 aıǵa deıin, al keıbir ónimder boıynsha odan da uzaǵyraq bolýy múmkin. Biz bul áserdi birtindep baıqaı bastadyq. Ekonomıkadaǵy nesıeler boıynsha paıyzdyq mólsherlemelerge qarasańyz, olar jyl basynan beri shamamen bir paıyzdyq tarmaqqa tómendedi. Demek, tómendeý úrdisi júrip jatyr jáne biz onyń jalǵasady dep sanaımyz, — dedi UB basshysy.
Buǵan deıin habarlanǵandaı, QR Ulttyq bankiniń Aqsha-kredıt saıasaty komıteti bazalyq mólsherlemeni jyldyq 15,75% deńgeıinde belgileý týraly sheshim qabyldady.
