Bankter mobıldi aýdarymdar komıssııasyn qashan túsiredi – Ulttyq bank jaýaby

ASTANA. KAZINFORM – Ulttyq bank tóraǵasynyń orynbasary Berik Sholpanqulov Senattaǵy dóńgelek ústelde bankter arasyndaǵy mobıldi aýdarym komıssııasy qashan túsetinin aıtty.

- Bankter arasyndaǵy aýdarymdarmen baılanysty komıssııa tarıfterin birizdendirýdi oılastyryp jatyrsyzdar ma? Ótkende aıttym, «Halyq bankten» 200 teńge aýdarylyp ketken aqshany Kaspi bank qaıtaryp berý úshin 3600 teńge komıssııa alady eken. Men bul ádiletsiz dep oılaımyn. Komıssııalardyń máselesi óte salmaqty, - dep surady senator Bekbolat Orynbekov.

Berik Sholpanqulov bul Mastercard, Visa halyqaralyq júıeleriniń talaby ekenin aıtady.

- Qazir bankter arasyndaǵy aýdarym tranzaktsııalary Mastercard halyqaralyq tólem júıesiniń kartalary arqyly jasalady. Solardyń tarıf saıasaty qoldanylyp otyr. Ózimiz daıyndaǵan mobıldi aýdarymdardyń Open API júıesi týraly nege aıtyp otyrmyn? Óz bankterimizdiń arasynda osy júıe arqyly aýdarym jasaýǵa múmkindik týady. Osyndaı jaǵdaıda komıssııa tarıfi júıege qatysatyn bankterge baılanysty bolady. Osy turǵyda tarıfter komıtetin qurdyq. Osylaısha bankterdiń tarıfterin tómendetý baǵytynda sheshimder qabyldaımyz. Óıtkeni arada úshinshi oıynshy bolmaıdy, - dedi ol.

Ulttyq bank ókili bul júıe mobıldi aýdarymdar boıynsha da, QR tólemder boıynsha da jumys isteıtinin aıtady.

- Qazir bankter arasyndaǵy búkil aýdarymdar Mastercard, Visa halyqaralyq júıeleri arqyly ótip jatyr. Olardyń óz tarıf saıasaty bar. Degenmen olar da bıyl komıssııa tarıfin 3 paıyzdan 1 paıyzǵa deıin túsirip otyr. Óz bankterimiz arasyndaǵy aýdarym júıesin iske qosqan sátte-aq, ol komıssııa tarıfteri qulaıdy, - dedi Berik Sholpanqulov.

Buǵan deıin Ulttyq bank mamyr aıynda Ulttyq qordan 1 mlrd dollar satýy múmkin ekenin jazǵan edik.