Bankter merzimi ótken nesıeni kollektorǵa satýyna shekteý engiziledi
Bankter men mıkroqarjy uıymdaryna jeke adamdardyń problemaly nesıelerin kollektorlyq agenttikterge satýyna shekteý engiziledi. Bul týraly Parlament Májilisinde kredıt berý kezinde táýekelderdi azaıtýǵa arnalǵan zań jobasynyń tanystyrylymynda depýtat Mádı Takıev aıtty, dep habarlaıdy Kazinform.
Onyń aıtýynsha, keıingi jyldary bankter men mıkroqarjy uıymdary óz balanstaryn tazartý úshin jeke tulǵalardyń problemaly nesıelerin úlken jeńildikpen kollektorlyq agenttikterge berý tájirıbesi qalyptasty. Sondyqtan bankter men mıkroqarjy uıymdarynyń kollektorlyq agenttikterge azamattardyń nesıelerin satýyna shekteý engizý qarastyrylǵan.
«Atap aıtqanda, problemaly nesıeler boıynsha tıisti protsedýralar banktiń ózinde bolýy kerek. Bastapqyda 24 aı beriledi, ıaǵnı qaryzdyń qurylymyn qaıta qaraý, kredıtin azaıtý men paıyzyn tómendetý is-sharalary qarastyrylýy tıis. Bul jumystar eskerilip, eki jyldan keıin ǵana boryshty kollektorlarǵa sata alady. Al qazirgi jaǵdaı qalaı? Bankter óz portfelin jaqsartý úshin osyndaı nesıelerdi jınap alyp, kollektorlarǵa tómen somaǵa satyp jiberedi. Máselen, bankte 500 mln teńge somasynda nesıesin ótemeı júrgen adamdardyń qaryzyn 300 mln teńgege kollektorlarǵa bere salady», - dedi Mádı Takıev Kazinform tilshisine bergen suhbatynda.
Depýtattyń sózine qaraǵanda, óz kezeginde kollektorlar atalǵan 500 mln teńgeni túgel óndirip alýǵa tyrysady.
«Osy jaǵdaıda kollektorlar qaryzdy óndirip alý kezinde dóreki áreketterge baryp jatatyny qoǵamda jıi kóterilip júr. Sondyqtan osyǵan jetkizbes úshin bankter aldymen óz jumysynda tıisti is-qımyldardy júzege asyrýy tıis. Mundaı qadamdar búgin Májiliste tanystyrylǵan zań jobasynda pysyqtalady», - dedi M. Takıev.
Aıta keteıik, búgin Májiliste Parlamenttiń bir top depýtaty bastamashy bolǵan «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi azaıtý jáne qaryz alýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy tanystyryldy.
