Bankter men polıtseılerdiń atynan jyl basynan 3 myń alaıaqtyq jasalǵan

ASTANA. QazAqparat – Bank jáne polıtsııa qyzmetkerleri retinde habarlasatyn alaıaqtar jyl basynan 3 myńnan astam qylmys jasady. Bul týraly QR ІІM Krımınaldyq polıtsııa departamenti kıberqylmysqa qarsy kúres ortalyǵynyń basshysy Jandos Súıinbaı málim etti, dep habarlaıdy QazAqparat tilshisi

«Tsıfrlyq tehnologııalardyń damýy olardyń kómegimen urlyqtyń artýyna ákeldi. Keıingi kezde ınternet-alaıaqtyq qoǵamda rezonans týdyryp otyr. Bıyl elimizde 18,5 myńnan astam ınternet-alaıaqtyq qylmysy tirkeldi. Bul ótken jylmen salystyrǵanda (19 328) tómen. Internet-alaıaqtyq kóbine taýarlardy onlaın satyp alýmen baılanysty. Atap aıtqanda osy ádispen 6 myń qylmys jasalǵan. Qazirgi ýaqytta bank nemese quqyq qorǵaý organdary qyzmetkerleriniń atynan jasalǵan alaıaqtyq erekshe alańdaýshylyq týdyryp otyr. Atalǵan tásilmen jyl basynan beri 3 myńnan astam alaıaqtyq qylmysy jasaldy», - dedi Jandos Súıinbaı Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, alaıaqtar abonenttik nómirdi aýystyrýǵa arnalǵan servısterdi belsendi paıdalanady.

«Áleýmettik ınjenerııa ádisterin qoldana otyryp, alaıaqtar shottaǵy kúdikti operatsııalar nemese nesıe alýǵa áreket týraly habarlaıdy. Kóbinese olar ózderin polıtsııa qyzmetkeri retinde tanystyrady nemese bank qyzmetkeri retinde arnaıy operatsııa júrip jatqanyn habarlaıdy», - deıdi ol.

Spıkerdiń málimetinshe, atalǵan jaıt boıynsha is ashylǵan jaǵdaıda Qylmystyq kodekstiń 190-baby 2-bóliginiń 4-tarmaǵy (aqparattyq júıeni paıdalanýshyny aldaý nemese onyń senimin teris paıdalaný arqyly jasalǵan alaıaqtyq) 4 jylǵa deıin bas bostandyǵynan aıyrýdy, aıyppul (4 myń AEK) salýdy kózdeıdi. Sondaı-aq toptasyp asa iri mólsherde qylmys jasaǵan jaǵdaıda aıyptylar 5 jyldan 10 jylǵa deıin bas bostandyǵynan aıyrylýy yqtımal.