Bankter men memleket ekonomıkany qarjylandyrýdy kúsheıtýge kelisti
ASTANA. KAZINFORM — Ulttyq Bankte ekinshi deńgeıli bankterdiń basshylarymen kezdesý ótip, onda ekonomıkany qoldaý jáne qarjy naryǵyn damytýǵa qatysty birqatar mańyzdy másele qaraldy.
Kezdesýge Ulttyq Bank tóraǵasy Tımýr Súleımenov, Premer-mınıstrdiń orynbasary — Ulttyq ekonomıka mınıstri Serik Jumanǵarın jáne Qarjy naryǵyn retteý jáne damytý agenttiginiń tóraıymy Mádına Ábilqasymova qatysty.
Jıyn barysynda kapıtal naryǵyn damytý jáne Baǵaly qaǵazdar naryǵyn damytý baǵdarlamasyn ázirleý, sındıkattalǵan kredıtteýdi jáne ınvestıtsııalyq jobalardy birlesip qarjylandyrý tetikterin keńeıtý máseleleri talqylandy.
Sondaı-aq ekinshi deńgeıli bankter men «Báıterek» holdınginiń bıznesti qarjylandyrýdaǵy ózara is-qımyly, kásiporyndardy qarjylyq saýyqtyrý jáne salyqtyq ákimshilendirý, energetıka men kommýnaldyq sektorlardy jańǵyrtýǵa baǵyttalǵan ulttyq jobany iske asyrý jaıy sóz boldy.
Kezdesý qorytyndysynda taraptar ekonomıkanyń naqty sektoryn qarjylandyrýdy keńeıtý, qarjy naryǵyn damytý jáne bıznesti qoldaý tetikteriniń tıimdiligin arttyrý baǵytyndaǵy birlesken jumysty kúsheıtýge kelisti.
Eske salaıyq, buǵan deıin Qazaqstan Ulttyq bankiniń tóraǵasy Tımýr Súleımenov jyldyq ınflıatsııanyń toǵyz aı qatarynan baıaýlaýyna áser etken negizgi sebepterdi ataǵan edi.
