Bankter men qonaqúılerdiń klıentterden jeke kýálik kóshirmesin talap etýine tyıym salynǵan
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstrligi Aqparattyq qaýipsizdik komıtetiniń tóraǵasy Rýslan Ábdiqalyqov ortalyq kommýnıkatsııalar qyzmetinde ótken baspasóz máslıhatynda uıymdardyń azamattardan jeke kýálik kóshirmesin talap etýi zańsyz ekenin eske saldy.
«Bárimiz ondaı jaıtqa tap bolǵan shyǵarmyz. Qonaqúıge barsańyz, jeke kýálik suraıtyn. Surap qana qoımaı qaǵazdaǵy kóshirmesin alyp qalatyn. Ondaı jaǵdaı ekinshi deńgeıli bankterde de, ózge uıymdarda da bolǵan. Qazir jeke basty kýálandyratyn qujattyń qaǵazdaǵy kóshirmesin jınaýǵa zańmen tyıym salynǵan», - dedi komıtet basshysy.
Buǵan deıin Qazaqstanda qonaqúı sany 2 237-ge jetkenin jazǵan bolatynbyz. Bul byltyrǵy jylmen salystyrǵanda 36-ǵa artyq. Bul jaıynda ulttyq statbıýrodan habarlandy.
Eń kóp qonaqúı Almaty (232) jáne Astana (190) qalalarynda, sondaı-aq Qaraǵandy oblysynda (139).
