Bankter ıpotekany qaıta qarjylandyrýdan 760 jaǵdaıda zańsyz bas tartqan – komıssııa

NUR-SULTAN. QazAqparat - QR Qarjy naryǵyn retteý jáne damytý agenttiginde ıpoteka alǵandardyń shaǵymyn qaraý jónindegi arnaıy komıssııanyń nátıjelerin jarııalady, dep habarlaıdy QazAqparat.

Komıtettiń málimetinshe, 2015 jyldan bastap komıssııaǵa el boıynsha bankterdiń ıpotekany qaıta qarjylandyrýdan bas tartýyna qatysty 5 168 shaǵym kelip túsken,onyń ishinde: Zańdy bas tartý– 2 650; zańsyz (bankter ókilettikterin asyra paıdalanǵan) – 760; baǵdarlamaǵa ózgerister jáne jańa áleýmettik ólshemsharttar eskerile otyryp, qaryz qaıta qarjylandyrýǵa tıis – 1 688; qaralyp jatqany – 70.

Ipotekalyq turǵyn úı qaryzdaryn qaıta qarjylandyrý baǵdarlamasy elimizde 2015 jyldyń basynan beri jumys isteýde.

«Qazir komıssııanyń jumysynda shamamen 70 ótinish jatyr, bul - medıtsınalyq uıymdardyń, áleýmettik qorǵaý jáne qamqorlyqqa alý organdarynyń jáne t.b. qorytyndysyn qaıtadan alǵan adamdar sanaty, ár jaǵdaıdyń óz mán-jaıy bar. Atalǵan shaǵymdar qazir qaralyp jatyr, árbir jeke qaryz alýshynyń ómirindegi jaǵdaıdy eskerip jatyrmyz. Jyldyń basynan bastap qoldanystaǵy baǵdarlamaǵa ózgeris engizildi, olar halyqtyń áleýmettik turǵydan osal tobyna qoldaý kórsetýge qatysty, olarǵa bankter borysh júktemesin azaıtýǵa múmkindik berýde», - dedi QR Qarjy naryǵyn retteý jáne damytý agenttigi Almaty qalasy boıynsha Óńirlik ókilder basqarmasynyń bastyǵy Sálıma Jurynova.

Onyń aıtýynsha negizgi másele barlyq banktiń adamdy halyqtyń áleýmettik osal sanatyna engizýge nıetiniń bolmaýy. Muny dáleldeý úshin qaryz alýshy zań boıynsha sotqa júginýge quqyly.

«Kommertsııalyq bankterdiń sizdiń usynymyńyzdy árqashan oryndaı bermeıtini bar. Osyndaı jaǵdaıda agenttik árqashan ótinish berýshiniń jaǵynda bolady, sondyqtan komıssııa jumysy nusqalarynyń biri – bul ótinish berýshi banktiń jáne bizdiń qurylymdar ókilderiniń qatysýymen ornalasqan jerlerde, óńirlerde kelissózder júrgizý. Biz bank komıssııasynyń sheshimine qaramastan ótinish berýshige nege qaıta qarjylandyrýdan bas tartatynyn anyqtaımyz. Ádette bas tartýdyń kóp bóligi ıpoteka alýshynyń paıdasyna sheshiledi. Eger másele kelissóz arqyly sheshilmese, onda qaryz alýshy tikeleı sotqa júginýge quqyly, odan ári agenttik qaryz alýshynyń múddesin bildiredi jáne ony sotta tolyq qoldaıdy», - dep qorytyndylady Sálıma Jurynova.

Qazaqstanda ıpotekalyq qaryzdardy qaıta qarjylandyrýdy 18 bank jáne 3 ıpotekalyq uıym júzege asyrady. Ipoteka alýshylardyń ótinishindegi bankterdiń úlesi mynadaı:

· Halyk Bank – 36%;

· Forte Bank – 19%;

· «TsentrKredıt Bank» – 14%;

· «ATFBank» – 14%;

· Kaspi.kz – 5%;

· «Astana Ipoteka» – 4%.

Eske sala ketsek, QR Ulttyq banki qyrkúıekte turǵyn úıdiń ıpotekalyq nesıesin qaıta qarjylandyrý baǵdarlamasyna ózgeris engizilgenin málim etti.