Bankter ıpotekalyq nesıeden nelikten jıi bas tartady — Súleımenovtiń pikiri

ASTANA. KAZINFORM — Ulttyq bank tóraǵasy Tımýr Súleımenov ekinshi deńgeıli bankterdiń ıpotekalyq nesıe berýden nelikten jıi bas tartatynyn aıtty.

— Syıaqynyń shekti jyldyq tıimdi mólsherlemesi degen túsinik bar. Bul — Ulttyq bank pen agenttiktiń (Qarjy naryǵyn retteý jáne damytý agenttigi) birlesken sheshimimen qabyldanatyn arnaýly qural. Qarjy uıymdary belgilengen shekten joǵary mólsherlememen nesıe bere almaıdy. Táýekelder teńgerimin, qarjylyq turaqtylyqty jáne tutynýshylardyń quqyǵyn qorǵaýdy eskere otyryp, biz ıpotekalyq zaımdar boıynsha mólsherleme 20 paıyzdan aspaýy tıis degen birlesken sheshim qabyldadyq. Óıtkeni, 20 paıyzdan joǵary ıpoteka — bul aýyrtpalyq. Adam 10-15 jylǵa 20 paıyzben nesıe alǵanda artyq tólemi óte qomaqty bolady, — dep túsindirdi Ulttyq bank basshysy BAQ ókilderiniń saýalyna oraı.

Ol Ulttyq bank ekinshi deńgeıli bankterge turǵyndarǵa ıpoteka berýdi toqtatý týraly tapsyrma bermegenin atap ótti.

— Bizde naryqtyq ekonomıka. Sondyqtan bankter mundaı tapsyrma alýy múmkin emes. Bankterdiń ózderi-aq mundaı joǵary mólsherlememen berilgen ıpoteka qaryz alýshynyń tólem jasaı almaı qalýyna alyp keletinin túsinetin sııaqty. Osy táýekelge baılanysty olar barynsha saqtyqpen sheshim qabyldaıdy, — dedi Tımýr Súleımenov.

Osy oraıda Ulttyq bank tóraǵasy azamattarǵa «Otbasy» bank baǵdarlamasyn qarastyrýǵa keńes beredi.

— Eger qarapaıym sózben aıtar bolsaq, mólshermesi 20 paıyzdan asatyn ıpoteka — bul óte aýyr qural. Oǵan úlken jaýapkershilikpen qaraǵan jón. Sol sebepti mólsherleme ázirshe joǵary bolyp turǵan kezde eń durysy turaqty jumys istep turǵan «Otbasy» bank quraldaryn paıdalanǵan jón sııaqty. Onyń portfeli ósip, tsıfrlandyrý qarqyndy damyp keledi. Ashyq baǵalaý júrgiziledi ári ónimderi de bárine qoljetimdi. Munan bólek, ortalyq ta, óńirlik te deńgeıden ózge de baǵdarlamalar júzege asyrylyp jatyr, — dedi Tımýr Súleımenov.

Buǵan deıin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18 paıyz deńgeıinde belgileý týraly sheshim qabyldaǵan edi.

Budan buryn Súleımenov halyqtyń boryshtyq júktemesiniń ósýin shekteý úshin makroprýdentsııalyq qural engiziletinin aıtty.