«Bankter endi baspanańyzdy tartyp ala almaıdy»-respýblıkalyq basylymdarǵa sholý
***
Búgin «Aıqyn» gazetiniń aptaǵa sholý jasaǵan nómiri shyqty. Basylymnyń birinshi betinde «Bankter endi baspanańyzdy tartyp ala almaıdy» degen taqyryppen maqala jarııalandy. Onda «halyqtyń kózi, qulaǵy hám aýzy» sanalatyn jýrnalısterdiń kásibı merekesine oraılastyryp, Senattyń tóraǵasy Qaırat Mámı keshe aqparat quraldarynyń ókilderimen kezdeskeni jáne olardyń birqatar suraqtaryna jaýap bergeni jazylǵan. Sóz arasynda Tóraǵa Senat «ıpotekalyq nesıeleý men tutynýshylar quqyǵyn qorǵaý, qarjylyq qyzmet kórsetý jóninde zańdardy» maquldaǵanyn aıtqan. Ondaǵy bir bapqa sáıkes, budan bylaı bankter azamattan jalǵyz baspanasy bolyp tabylatyn páterin ne úıin tartyp alyp, aýktsıonǵa sala almaıdy.
«Adam qýatty dámniń kómegimen de aýrýyn jeńe alady». «Jasaı» Shyǵys-tıbet medıtsınalyq ortalyǵynyń dırektory, medıtsına ǵylymdarynyń doktory, professor Jasan Zekeıulynan alynǵan suhbat «Aıqyn» gazetinde osyndaı taqyryppen jaryq kórdi. «Qazir emhanalarda botqa men borş, bir tilim myjylǵan et beredi. Oǵan saý adamnyń da densaýlyǵy shydamaıdy. Jetpis jyl burynǵy «qalpaq» áli sheshilmegen tárizdi. Odan da aýrýhanalarda shubat pen qymyzdy, jylqynyń etin berip, qazaqtyń kúılerin oınatyp, palatalar ádemi torsyqtar men ulttyq órnekterimizben bezendirilse, keremet emes pe?! Adam qýatty dámniń kómegimen de aýrýdy jeńe alady», - deıdi tilshi suraqtaryna jaýap bergen ǵalym.
**
«Alash aınasy» gazetinde «Ulttyq qundylyqtarǵa qatysty zań nege mańyzdy qujattardyń qatarynda joq» degen taqyryppen maqala basyldy. Maqalada áli kúnge deıin ulttyq qundylyqtarymyzdy menshikteı almaı kele jatqanymyz jaıly aıtylady. «Qymyz óndirý úshin ruqsatty nemisterden suraý kerek eken» dese, boıyńyzdy qandaı sezim bıler edi? Kózińiz sharasynan shyqpasa da, qanyńyz basyńyzǵa shapshyp, talaǵyńyz tars aıyrylýǵa shaq qalary anyq. Áıtpese «babadan balaǵa mıras bolyp kele jatqan ulttyq sýsynymyzdy daıyndaý úshin qazaqqa úsh qaınasa sorpasy qosylmaıtyn nemisten ruqsat suraý degen ne sumdyq?» dep ejireıe qaraýyńyz múmkin. Qandaı kúıge tússeńiz de, rasyn aıtaıyq, bolashaqta qymyz óndirý úshin nemisten ruqsat surap jatýymyz ǵajap emes. Sebebi búginde qymyzymyzdy Gans Tsolman degen nemistiń patenttep alǵanyn bárimiz bilemiz», - delingen maqalada.
«Parlament únsiz bolsa, qoǵamnan maza ketetinin eskergen jón». «Alash aınasynyń» turaqty «Dat!» aıdarynyń aıasynda Májilis depýtaty Irak Elekeevten alynǵan suhbat osyndaı taqyryppen basyldy. Depýtattyń pikirinshe, qoǵam arasyndaǵy qordalanǵan máseleni Májiliske jetektep kirgizip, tý-talaqaıyn shyǵaryp, talqyǵa salǵannan utpasaq, utylmaımyz. Suhbattyń tolyq nusqasymen tanysqyńyz kelse, basylymnyń búgingi sanyn jiberip almańyz.
***
«Nur Astana» gazetiniń búgingi nómirinde «Til janashyrynyń» jeńimpazdary anyqtaldy» degen taqyryppen aqparattyq materıal berildi. Onda «Memlekettik tildi damytý» Prezıdenttik qory jyl saıyn beriletin «Qazaq tilin nasıhattaýǵa qosqan úlesi úshin» jýrnalıstik syılyǵynyń jańa júldegerleriniń esimderin jarııa etkeni jazylǵan. Bıylǵy syılyqqa respýblıkalyq BAQ-tyń úsh ókili: Ǵabıt Músirep («Nur Astana» gazetiniń Bas redaktory), Maksım Rojın («7 telearnanyń» jýrnalısi), Álııa Kenjebaeva («Astana» telearnasynyń jýrnalısi) ıe bolǵan.
Osy basylymda «Jýrnalısterdiń mártebesi týraly zań kerek» degen taqyryppen Májilis apparaty baspasóz qyzmetiniń jetekshisi Saıyn Sháımerdennen alynǵan suhbat jarııalandy. «Negizi, jýrnalısterdiń mártebesi týraly zań kerek. BAQ týraly zańda jýrnalısterdiń áleýmettik jaǵynan qorǵalýy, turmys-tirshiligi týraly baptar jazylmaǵan. Biz halyqtyń sózin bılikke jetkizetin, bıliktiń jumysy týraly halyqty qulaqdar etetin dánekermiz ǵoı», - deıdi suhbat berýshi.
***
«Kazahstanskaıa pravda» gazeti búgingi sanynda keshe Qazaqstan Respýblıkasynyń Syrtqy ister mınıstri Erjan Qazyhanov AÓSShK-niń atqarýshy dırektory Chınar Aldemırdi qabyldaǵanyn jazady. Kezdesýde qazaqstandyq syrtqy saıası vedomstvo basshysy, AÓSShK bastamasy álemdik qaýymdastyqta bedelge ıe bolyp, tıisti jalǵasyn taýyp jatqanyn atap kórsetken, bul úderistiń BUU aıasyndaǵy Ortalyq Azııadaǵy lańkestikpen kúres, Aýǵanstan jónindegi jumys toptaryna jáne EQYU-nyń preventıvti dıplomatııa men shıelenisterdiń aldyn alý jónindegi jumys tobyna qosylýy osynyń dáleli. Materıal «V prostranstve SVMDA» degen taqyryppen berilgen.
