Bankter ekonomıkalyq jobalardy nesıeleýge nege nıetti emes – Ulttyq bank jaýaby
Ekinshi deńgeıli bankterdiń bızneske nesıe berýin yntalandyrýǵa qosymsha jaǵdaı jasaý maqsatynda Ulttyq bank pen Qarjy naryǵyn retteý agenttigi qosymsha sharalardy qolǵa aldy, dep habarlaıdy Kazinform.
Qyrkúıektiń alǵashqy kúni Qazaqstan halqyna Joldaýyn jarııalaǵan Memleket basshysy qazir elimizdegi 21 banktiń birnesheýi ǵana ekonomıkalyq jobalardy qarjylandyratynyn aıtyp, qarjy sektoryndaǵy júıesiz jumystardy synǵa aldy. Osy máselelerdiń sebebin bilmek maqsatta Kazinform Ulttyq bankke resmı hat joldady da: «Nelikten ózge bankter ekonomıkanyń naqty sektorlaryna qarjy baǵyttaýǵa nıetti emes?» degen saýal qoıdy.
Buǵan oraı mynadaı jaýap keldi: «Úkimet ekonomıkany kredıtteýdi turaqty ósýdiń negizgi faktory ekenin túsine otyryp, Ulttyq bank pen Qarjy naryǵyn retteý jáne damytý agenttigimen birlesip, bankterdiń bızneske kredıt berýin yntalandyrýǵa qosymsha jaǵdaı jasaý maqsatynda jumys istep jatyr. Máselen, óńdeý ónerkásibi men agroónerkásip keshenindegi jobalardy sındıkattalǵan kredıtteý men ortaq qarjylandyrýdy damytý, astyq qolhattary jáne jer qoınaýyn paıdalaný quqyǵy túrindegi kepil tetiginiń tıimdiligin arttyrýǵa baılanysty sharalar qabyldanyp jatyr».
Bankten atap ótkendeı, nesıe kóleminiń artýyna prýdentsıaldyq jáne fıskaldyq yntalandyrý da yqpal etedi. Ol úshin nesıe bıýrolarynyń aqparaty men memlekettik derekqorlardyń málimetin biriktirý qajet. Sonda bankterdiń ekonomıkalyq jobalardy qarjylandyrýdaǵy táýekeldi tustary azaıady, kúdigi seıiledi.
«Qazir bankter men kredıttik bıýrolardy memlekettik derekqorlarmen biriktirý arqyly ınfraqurylym jetildirilip jatyr. Bul – tsıfrlandyrý arqyly bıznes úshin qarjylyq qyzmetterdiń qoljetimdiligin aıtarlyqtaı arttyrady. Bankterdiń shyǵynyn azaıtyp, nesıelik táýekeldi baǵalaý sapasyn kóteredi jáne saıyp kelgende, nesıe ónimderiniń qoljetimdiligin ilgeriletýge yqpal etedi», - delingen agenttik saýalyna oraı joldanǵan jaýapta.
Bul rette UB ekinshi deńgeıli bankterdiń nesıe saıasatyna aralasý zańsyz ekenin alǵa tartty. Olar óz jumysyn arnaıy talapqa saı júrgizedi. Sáıkesinshe, olardy ekonomıkalyq jobalarǵa aqsha salýǵa mindetteý quqyq sheńberinen tys áreket retinde sanalady.
«Naryqtyq ekonomıka paradıgmasynda memlekettik organdardyń bankterdiń operatsııalyq qyzmetine tikeleı aralasýǵa quqyǵy joq. Ekinshi deńgeıli bankter birqatar faktordy eskere otyryp, ózderiniń nesıe saıasatyn óz betinshe belgileıdi», - delingen Ulttyq banktiń jaýabynda.
