Bankter BJZQ qarjysyn tutynýshylyq kredıtke jumsap qoımaı ma – UB jaýaby

ASTANA. KAZINFORM – Búginde Biryńǵaı jınaqtaýshy zeınetaqy qorynyń 226 mlrd teńgesi bankterdiń uzaqmerzimdi oblıgatsııalaryna ınvestıtsııalanǵan. Kazinform agenttigi Ulttyq bankten bul qarjynyń tutynýshylyq kredıtke baǵyttalmaı, ekonomıkanyń naqty sektoryn nesıeleýge jumsalýy qalaı baqylanatynyn surap bildi.

— Bankter tartqan qarajatty maqsatty paıdalaný Qazaqstan qor bırjasynyń saıtynda ornalastyrylatyn oblıgatsııa shyǵarý prospektisimen bekitilgen. Qazaqstan Respýblıkasynyń Qarjy naryǵyn retteý jáne damytý agenttigi Ulttyq bankpen birlesip tartylǵan qarajatty bankterdiń qalaı ıgerip jatqanyna monıtorıng júrgizedi, - delingen resmı jaýapta.

Bankterge talaptar saqtalmaǵan jaǵdaıda júkteletin jaýapkershilik te aıqyndalǵan.

- Máselen, oblıgatsııalar prospektisinde belgilengen kovenanttar buzylǵan, onyń ishinde olar tartylǵan qarajat ýaqtyly ıgerilmegen jaǵdaıda, bank ıgerilmegen nemese maqsatsyz paıdalanylǵan qarajatqa BJZQ aldyndaǵy oblıgatsııalardy merziminen buryn óteýge mindetti, - deıdi Ulttyq bankten.

Buǵan deıin 2025-2026 jyldary BJZQ-nyń 1,5 trln teńgesin naryq sharttarymen kvazımemlekettik sektordyń qundy qaǵazdaryna baǵyttaý týraly baǵdarlama qabyldanǵan bolatyn. 

Ulttyq banktiń naqtylaýynsha, atalǵan baǵdarlama aıasynda 146 mlrd teńgege «Qazaqstan Halyq Banki» AQ-nyń jáne 80 mlrd teńgege «Bank «Bank RBK» AQ-nyń oblıgatsııalary satyp alynǵan, ıaǵnı atalǵan bankterge osynsha qarjy aýdarylǵan.