Bankter bızneske qoldaý jasaý jumysyn jandandyrýy tıis - sarapshy

ASTANA. QazAqparat – Bankterge qatysty salyq mólsherin qaıta qaraý kerek. Bul týraly belgili saıasattanýshy, sarapshy Talǵat Qalıev aıtty.

«Saıası reformalar turǵysynan alyp qarasaq, aýdan jáne oblystyq deńgeıdegi qalalardyń ákimderin saılaýdy engizý mańyzdy sanalady. Bul bastama Ulttyq qoǵamdyq senim keńesi otyrysynda aıtylǵan edi. Atap aıtqanda, bul baǵyttaǵy qadamdarǵa taldaý jasalyp, onyń nátıjesi ońtaıly dep tanyldy. Sondyqtan osy ınstıtýtty jergilikti jerlerde engizý sheshimi jasaldy. Jalpy, bul sheshimdi óte mańyzdy sanaımyn, sebebi azamattardyń ómir súrý sapasyna tikeleı áser etedi», - dedi T. Qalıev 

Budan bólek sarapshy Prezıdent Joldaýynda bank sektoryna qatysty aıtylǵan usynystarǵa toqtaldy. 

«Elimizdegi bankter ekonomıkanyń naqty sektoryna nesıe bólý baǵytynda bıznespen belsendi jumysyn jandandyrýy tıis. Máselen, sheteldegi iri bankter bıznestiń damýyna erekshe mán berip jatyr, ıaǵnı olardyń tabysty ınvestıtsııa salýyna qoldaý jasap, bıznes jospardy daıarlaýǵa atsalysyp otyr. Olarǵa ózderiniń klıentteriniń dáýleti artqany tıimdi. Bul turǵyda bizdiń de bankter osy jaǵynan belsendi bolýy kerek», - dedi saıasattanýshy.

Onyń paıymynsha, bankterge qatysty salyq mólsherin qaıta qaraý kerek. 

«Olardyń qomaqty dıvıdend alyp otyrǵan kórip otyrmyz. Degenmen, tólep jatqan salyǵy sonshalyqty eleýli emes», - dedi saıasattanýshy. 

Aıta keteıik, búgin Qazaqstan halqyna Joldaýynda Prezıdent Qasym-Jomart Toqaev bankterdiń aktsıonerleri dıvıdendine sáıkes salyq tóleýi kerek ekenin aıtty. 

Osy oraıda «Bankter týraly» jańa zań qajet ekeni atap ótildi. 

Sonymen qatar Memleket basshysy budan bylaı aýdan jáne oblystyq mańyzy bar qalalardyń ákimderi tikeleı saılaý arqyly ǵana qyzmetke keletinin jetkizdi.