Bankter aýyl sharýashylyǵyn nesıeleýge kelgende órt kórgendeı óre túregeledi - Shókeev

ASTANA. QazAqparat - Ekinshi deńgeıli bankterdiń agroónerkásip keshenin nesıeleýdegi táýekelderin tómendetý qajet. Mundaı pikirdi búgin Astana Agroforum-2018  respýblıkalyq keńes barysynda QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev aıtty, dep habarlaıdy QazAqparat tilshisi.

«Aýyl sharýashylyǵyn kredıtteý úshin ekinshi deńgeıli bankterdiń táýekelderin tómendetýimiz qajet. Qazir kez kelgen bankırden «aýyl sharýashylyǵyna nesıe beresiz be?», dep surasańyz, olar «eshqashan» deıdi. Olar ásirese Tsesnabankten keıin qorqady, órt kórgendeı óre túregeledi. Óıtkeni, buǵan deıingi oqıǵalar onyń qaýipti ekenin kórsetti», - dedi Ómirzaq Shókeev.

Onyń aıtýynsha, elimizdiń aýyl sharýashylyǵy mınıstrligi ekinshi deńgeıli bankterge  táýekelderdi tómendetý maqsatynda úlken holdıngterden aryldy. Óıtkeni, nesıeniń basym bóligin solar alyp keldi. Qazirgi ýaqytta barynsha utqyr, túsinikti, qurylymdanǵan ortasha deńgeıli kompanııalarǵa basymdyq beriledi.

«Osy orta deńgeıli kompanııalar bankterge barynsha  qaýipsiz bolýy úshin jańa tetikter engizip jatyrmyz. Máselen, agrarlyq qolhat. Qazirgi ýaqytta zań jobasy májilistiń qaraýynda jatyr. Onyń máni mynada. Aıtalyq, ferma nemese aýyl sharýashylyǵy kompanııasy 1 myń gektar jerinen orta eseppen gektaryna 10 tsentner astyq nemese 1 myń tonna bıdaı alady delik. Sonda ol atalǵan astyq qunynyń 30-40 paıyzyn qaǵaz aınalymǵa shyǵaryp, kredıt ala alady. Atalǵan qaǵaz ekinshi deńgeıli bankter úshin kepil qyzmetin atqarady», - dedi ol.

Aıta keteıik, osy jyldyń qyrkúıek aıynda QR Úkimeti men QR Ulttyq bankiniń birlesken málimdemesi jarııalandy. 

Onda aýyl sharýashylyǵy ónimin óndirýshilerdi jáne búkil agrarlyq sektordy qoldaýdy kózdeıtin is-sharalar paketi usynyldy. Osy jumystar aıasynda 2018 jylǵy 19 qyrkúıekte QR Úkimeti men QR Ulttyq Banki «Tsesnabank» AQ-nan 450 mlrd teńgeniń aýyl sharýashylyǵy nesıeleriniń portfelin satyp alý tetigin bekitti.