Bankter arasyndaǵy ortaq QR-kodqa eki bank qana qosylǵan
ASTANA. KAZINFORM – Ulttyq bank tóraǵasynyń keńesshisi – Tsıfrlyq tranzaktsııalar jónindegi jetekshi Bınur Jalenov bankter arasyndaǵy biryńǵaı mobıldi aýdarym júıesi qashan jumys isteı bastaıtynyn aıtty.
- Júıe byltyr ázirlenip, qanatqaqty rejımde iske qosylǵan bolatyn. Búgingi tańda bankter kezeń-kezeńmen osy júıege qosylyp jatyr. Ulttyq tólem korporatsııasy 9 bankpen kelisimshart bekitti. Ol toǵyz bank – Halyq bank, Bank Tsentr kredıt, Freedom bank, RBK, Altyn bank, Bereke bank, Forte bank, HomeCredit bank jáne Nurbank.
Kelisimsharttyń bekitilýi - osy bankter júıege qosylý baǵytynda belsendi jumys istep jatyr degen sóz.
Maýsym aıynda klıentter alǵashqy bes banktiń arasynda telefon nómiri boıynsha aýdarym jasaı bastaıdy dep kútip otyrmyz. Tizimdegi bes bank – Halyq bank, Freedom, RBK, Altyn bank jáne Home Credit. Keıin ózgeleri de qosylady, - dedi Bınur Jalenov Ulttyq bankte ótip jatqan baspasóz máslıhatynda.
Sondaı-aq, ol bankter arasyndaǵy QR-tólemder quraly qoldanysqa daıyn ekenin málim etti.
- Freedom bank pen RBK jumysty aıaqtady. Onyń syrtynda taǵy 4 ekinshi deńgeıli bankpen belsendi jumys júrip jatyr. Jyl aıaǵyna deıin birneshe bank osy quraldy iske qosady dep kútip otyrmyz, - dedi Ulttyq bank basshysynyń keńesshisi.
Buǵan deıin Ulttyq bank tóraǵasynyń orynbasary Berik Sholpanqulov bankter mobıldi aýdarymdar komıssııasyn qashan túsiretinin aıtqan edi.