Bankterge alaıaqtar qurbandarynyń shyǵynyn óteý mindettelýi múmkin
ASTANA. KAZINFORM — Bankter men uıaly baılanys operatorlary alaıaq qurbandarynyń shyǵyndaryn óteýge mindetti bolýy múmkin. Mundaı múmkindikti Іshki ister mınıstrligi qarastyryp jatyr.
— Ekinshi deńgeıli bankter men uıaly baılanys operatorlaryna olardyń ınfraqurylymyn paıdalana otyryp jasalatyn alaıaqtyq is-qımyldar úshin zardap shekken azamattyń shyǵyndaryn óteý mindettemesi bar yntymaqty jaýapkershilik júkteý bastamasy qarastyryp jatyr, — delingen vedomstvonyń agenttik saýalyna bergen jaýabynda.
Elimizde quqyq qorǵaý organdary, ekinshi deńgeıli bankter jáne Qarjylyq monıtorıng agenttigi azamattar men qarjy júıesin alaıaqtardan qorǵaýǵa baǵyttalǵan keshendi is-sharalardy júzege asyryp jatyr.
Іshki ister mınıstrliginiń aqparatyna qaraǵanda, mundaı is-sharanyń biri — ekinshi deńgeıli bankter júıesin quqyq qorǵaý organdarynyń derekter bazasymen qosýdy kózdeıtin Derekter bazasyn yqpaldastyrý jobasy. Bul bankter pen polıtsııa arasyndaǵy barynsha tıimdi yntymaqtastyqty qamtamasyz ete otyryp, alaıaqtyq is-áreketti jedel anyqtaýǵa jáne aldyn alýǵa múmkindik beredi. Munan bólek, quqyq qorǵaý organdarynyń, uıaly baılanys operatorlarynyń, tólem jasaý uıymdarynyń, ekinshi deńgeıli bankterdiń, mıkroqarjy uıymdarynyń, Ulttyq bank pen Qarjy naryǵyn retteý jáne damytý agenttiginiń birlesken jumysyna arnalǵan platforma — Antıfrod ortalyǵy qurylǵan. Onyń maqsaty — qarjy salasyndaǵy alaıaqtyq áreketterdi anyqtaý jáne aldyn alý.
— Ekinshi deńgeıli bankter sáıkestendirý protsedýralaryn kúsheıtti: onlaın nesıe alý barysynda klıenttiń mobıldi qurylǵysyna birretik kodty mindetti túrde jiberý engizildi. Bul kredıttik ónimge sanktsııalanbaǵan qoljetimdilik táýekelin tómendetedi, — dedi mınıstrlikten.
Antıfrod ortalyǵy kúdikti belsendilikti anyqtaý úshin tranzaktsııalardy monıtorıngileý jáne saralaý júıesin belsendi túrde qoldanady. Osy jumys aıasynda aýdarym somasy, operatsııa jıiligi syndy túrli parametrlerdiń shekti máni qoldanylyp, tranzaktsııalardy óńdeý barysynda avtomatty túrde salystyrý júrgizý úshin alaıaqtyqqa kúdiktilerdiń tizilimi jasalyp jatyr.
Qarjylyq monıtorıng agenttigi kúdikti operatsııalardyń turpattamasyn ázirledi. Alaıaqtyq belgileri bar operatsııalardy anyqtaý qarjylyq mekemelerge kúdikti tranzaktsııalardy tıimdi anyqtaýǵa jáne aldyn alýǵa múmkindik beredi. Sondaı-aq, belgili alaıaqtardyń tizimi qalyptastyrylyp, jańartylyp otyrady. Bul da qarjy ınstıtýttaryna kúdikti operatsııalardy der kezinde buǵattaýǵa nemese toqtatýǵa múmkindik beredi.
— Bul sharalar memlekettik organdar men qarjylyq mekemeler arasyndaǵy barynsha tyǵyz yntymaqtastyqty qamtamasyz ete otyryp, azamattardyń qarjylyq qaýipsizdigin nyǵaıtýǵa ári alaıaqtyq is-áreketterden qorǵaýǵa baǵyttalǵan, — dep atap ótedi vedomstvodan.
Buǵan deıin tek bir kúnde Balqash, Taraz, Ekibastuz jáne Petropavl qalalarynda kıberpolıtsııa bólinisteri prokýratýramen jáne uıaly baılanys operatorlarymen birlesip, sim-box jabdyqtarynyń zańsyz jumysyn áshkereleý boıynsha is-sharalar júrgizgenin jazǵan edik.