Bankter «7-20-25» baǵdarlamasyna qatysýǵa daıyn - Danııar Aqyshev

ASTANA. QazAqparat - Bankter «7-20-25» baǵdarlamasyna qatysýǵa daıyn ekenin málimdedi. Bul týraly Májilistiń jalpy otyrysynan keıin tilshilerge QR Ulttyq bank tóraǵasy Danııar Aqyshev aıtty, dep habarlaıdy QazAqparat.

«Budan buryn jarııalanǵandaı, «7-20-25» baǵdarlamasyn 2018  jyldyń ekinshi jartyjyldyǵynan bastap júzege asyrýǵa nıettimiz. Alaıda onyń sátti ótýi úshin bizge aldymen zańnamany ózgertý kerek bolyp otyr, ıaǵnı erejelerdiń tıisti deńgeıde jumys isteýine nazar aýdarylady. Ekinshiden, bul baǵdarlamany tek naryqtyq ustanymdar aıasynda iske qosamyz jáne bizben talqylaýda bolǵan bankter baǵdarlamanyń negizgi operatorlary retinde kirisedi. Osy oraıda olardyń barlyǵy  ózderiniń daıyn ekendikterin málimdedi. Jalpy, bankterdi atalǵan baǵdarlamanyń talaptarymen kelisip otyr», - dedi Aqyshev.

Osy oraıda ol búginde banktermen osy baǵdarlamany júzege asyrýdyń mán-jaıy pysyqtalyp jatqanyn atap ótti.

«Sondyqtan 2018 jyldyń ekinshi jartyjyldyǵynan bankter usynystar jasaýǵa daıyn bolýy úshin olarmen tıisti qadamdardy pysyqtap jatyrmyz», - dedi UB basshysy.

Esterińizge sala keteıik, Qazaqstan Prezıdenti Nursultan Nazarbaev «Prezıdenttiń bes áleýmettik bastamasy» atty halyqqa úndeýin jarııa etti.

Osy bastamalardyń biri «Árbir otbasyna baspana alýdyń jańa múmkindikterin berý» baǵytyna arnalyp otyr.

«Sondyqtan, men «7 - 20 - 25» baǵdarlamasyn usynamyn. Jumys isteıtin árbir qazaqstandyq tómendegideı sharttar boıynsha teńgemen nesıe alý múmkindigine ıe bolady. Nesıe ósiminiń mólsherlemesi qazirgideı 14-16 emes, jylyna 7 protsentten aspaıtyn bolady. Qazir bankter bastapqy jarnaǵa baspana qunynyń 30 protsentine deıin, keıde tipti 50 protsentin salýdy talap etse, bul baǵdarlama boıynsha ol 20 protsentten aspaýǵa tıis.  Nesıe alýshynyń aı saıynǵy tólemin azaıtý úshin onyń merzimi 10-15 emes, 25 jylǵa deıin bolady.  Ol úshin Ulttyq banktiń, ekinshi deńgeıli bankter men qor naryǵynyń múmkindikterin iske qosý kerek», - dep atap ótti Memleket basshysy.