2025 jyldan bastap banktiń operatsııalardan tapqan paıdasyna salyq salynady
QazAqparat tilshisiniń saýalyna jaýap bergen Memlekettik kirister komıteti Ádisteme departamentiniń dırektory Álııa Jetibaeva jańa Salyq kodeksine engizilip jatqan ózgerister týraly aıtyp berdi.
Álııa Jetibaeva málimdegendeı, jańa kodekske saı, eki jyldan keıin bankter operatsııa men qundy qaǵazdardan tapqan paıdasynan salyq tóleıdi.
«Bank júıesindegi salyq tólemderi máselesi oryndy kóterilip otyr. Búginde ótip jatqan Májilis otyrystarynda jańa Salyq kodeksiniń jobasyna birneshe ózgeris engizilip jatyr. Sonyń ishinde bankterge 2025 jyldan bastap korporatıvtik tabys salyǵy negizinde salyq salynady degen normalar bar. Naqtylasam, ıaǵnı 2025 jyldan bank operatsııalary men Ulttyq banktiń notalaryna salyq salynady», – dedi Álııa Jetibaeva QazAqparat tilshisiniń saýalyna bergen jaýapta.
Spıker atap ótkendeı, búginde korporatıvtik tabys salyǵynyń mólsherlemesi – 20%. Jańa Salyq kodeksi qabyldansa, onda banktik operatsııalardan osy kólemde salyq tólemi alynady.
Eske salaıyq, taıaýda Parlament Senatynyń tóraǵasy Máýlen Áshimbaev Qazaqstanda jumys isteıtin bankterdiń operatsııalar arqyly taýyp jatqan paıdasyna salyq salý máselesi qarastyrylatynyn málimdegen edi.
Al Senat depýtaty Albert Raý bankter qundy qaǵazdar tabysynan salyq tólemeıtinin aıtyp, máseleni retteýdi usyndy.
