Bankter 2016 jyldyń 1 qańtaryna deıin «nashar» nesıelerdiń deńgeıin 10%-ǵa deıin tómendetedi
ASTANA. QazAqparat - Ekinshi deńgeıli bankter 2016 jyldyń 1 qańtaryna deıin ózderiniń portfelindegi «nashar» nesıelerdiń deńgeıin 10%-ǵa deıin tómendetedi. Bul týraly búgin OKQ brıfınginde QR Ulttyq bank tóraǵasy Qaırat Kelimbetov aıtty.
Onyń málimetinshe, 2004-2007 jyldar aralyǵyndaǵy jumys istemeı turǵan nesıelerdiń «qaldyǵyn tazartý» kezeń-kezeńimen júzege asyrylady. Sol kezde bul kórsetkish 33% quraǵan bolsa (ıaǵnı árbir úshinshi nesıe jumys istemeıtin bolǵan), 2015 jyldyń 1 qańtarynda bul san 23,5%-ǵa tústi.
«Daǵdarys kezinde qaıta qurýǵa ushyraǵan bankterden basqasynyń barlyǵy derlik nashar nesıeler ózderiniń portfeliniń 15%-ynan aspaýy kerek degen tapsyrmany oryndady deýge bolady. Al 2016 jyldyń 1 qańtaryna deıin bul kórsetkish 10%-dan aspaıdy dep kútemiz. Sondyqtan barlyq bankter osy normaǵa saı bolýy tıis. Eger de qandaı da bir bank bul mejege saı kelmese, onda ol normatıvti buzdy dep tanylyp, barlyq sharalar qoldanylady», - dep atap ótti Q. Kelimbetov.
