Bankten 87 mln teńge jymqyrǵan qostanaılyq Reseıden ustaldy

QOSTANAI. QazAqparat – Qostanaı oblysy polıtsııa departamentiniń bastyǵy Beket Aımaǵambetov halyqqa esep berý kezdesýinde bank qyzmetkeriniń qylmysy ashylǵanyn aıtty, dep habarlaıdy QazAqparat.

Vedomstvo basshysynyń aıtýynsha, 2019 jyly 11 qarashada Jitiqara qalasynda asa iri mólsherde qarajat jymqyrý deregi tirkeldi.

Bank qyzmetkeri óziniń jeke shotyna 87 mıllıon teńgeden astam qarjy aýdaryp, birden QR aýmaǵynan qashyp ketken.

«Kúdikti Reseıdiń Chelıabi qalasynda ustaldy. Qazirgi ýaqytta biz osy qylmystyq isti tergeýdi aıaqtap qaldyq jáne is sotqa jiberiledi. Qazir protseske qatysýshylar is materıaldarymen tanysady. Negizgi tergeý áreketteri Reseı Federatsııasynyń aýmaǵynda pandemııa kezinde júrgizildi. Ol úshin Qazaqstan Premer-Mınıstriniń kabıneti arqyly RF quzyretti organdaryna quqyqtyq kómek kórsetý týraly halyqaralyq tapsyrma joldandy», - deıdi Beket Aımaǵambetov.

RF quqyq qorǵaý organdary tarapynan tolyq qoldaý alyndy. Bul qylmystyq is materıaldaryna tirkelgen zattaı dáleldemelerdi alýǵa múmkindik bergen.

Qazir bank qyzmetkeriniń urlap ketken qarajaty tolyǵymen qaıtaryldy.