Banktegi shot buǵattalǵan kezde ne isteý kerek
ASTANA.KAZINFORM – Qarjy naryǵyn retteý jáne damytý agenttigi shot buǵattalǵan kezde ne isteý kerek, buǵattaý táýekelin qalaısha tómendetýge bolatyny jóninde túsinik berip ótken.
Banktik shotty buǵattaý — bank klıenti tap bolýy múmkin jaǵdaı. Buǵattaýdyń sebepteri ártúrli bolýy múmkin: tehnıkalyq irkilisterden bastap zańnamany buzýyna kúdik keltirýge deıin.
Qarjy naryǵyn retteý jáne damytý agenttigi mundaı jaǵdaılarda qalaı áreket etý kerektigin eske salady.
Shotty buǵattaýdyń yqtımal sebepteri:
- alaıaqtyq nemese ádetten tys operatsııalarǵa kúdiktiń bolýy (mysaly, iri nemese jıi aýdarymdar, ásirese shetelden);
- memlekettik organdardyń suraý salýy boıynsha buǵattaý (salyq qyzmeti, sot oryndaýshylary, qarjy monıtorıngi organdary);
- bank júıesindegi tehnıkalyq aqaý nemese qate;
- qate PIN-kodty engizý, kartanyń qoldanys merziminiń aıaqtalýy.
Eger shot buǵattalǵan bolsa ne isteý kerek?
Eger siz shotqa qoljetimdilik shektelgenin baıqasańyz, birinshi kezekte banktiń mobıldik qosymshasyndaǵy habarlamalardy tekserińiz — sebebi sol jerde kórsetilýi múmkin.
Bankpen koll-ortalyq arqyly baılanysyńyz nemese tolyq aqparat alý úshin jaqyn jerdegi bólimshege habarlasyńyz. Kirýdi qalpyna keltirý úshin qandaı áreketter qajet ekenin anyqtańyz.
eGov.kz nemese salyq tóleýshiniń kabıneti arqyly yqtımal bereshektiń bolýyn tekserińiz. Qajet bolǵan jaǵdaıda qarajattyń shyǵý kózin rastaıtyn qujattardy daıyndańyz jáne usynyńyz.
Buǵattaý táýekelin qalaısha tómendetýge bolady:
- kásipkerlik qyzmet úshin jeke shotty paıdalanbańyz;
- iri aýdarymdar jáne ózge de ádettegiden tys operatsııalar týraly bankke aldyn ala habarlańyz;
- derbes derekterdiń ózektiligin jáne qujattardyń qoldanys merzimderin qadaǵalańyz;
- bereshektiń bolýyn únemi tekserip otyryńyz jáne olardy ýaqtyly tóleńiz.
Aıta ketelik Qarjy mınıstrligi turǵyndardyń shottaryn jappaı buǵattaý jaǵdaıyn túsindirgen edi.
