«Bankte jumys istep, klıentterdiń atynan nesıe rásimdegen»: Asa iri alaıaqtyq jasaǵan kúdikti Reseıden ekstradıtsııalandy

ASTANA. KAZINFORM – Qazaqstan Bas prokýratýrasy asa iri kólemde alaıaqtyq jasaǵany úshin qylmystyq jaýapkershilikke tartý maqsatynda Qazaqstan azamatyn Reseı Federatsııasynan ekstradıtsııalady.

2019-2022 jyldar aralyǵynda kúdikti Taraz qalasyndaǵy bank fılıalynyń qyzmetkeri bola otyryp, bank klıentteriniń atynan olarǵa nesıe rásimdegen. Ári qaraı bank klıentteriniń shottaryna qol jetkizgen kúdikti nesıe qarajatyn dostarynyń esepshotyna aýdaryp, keıin ony qolma-qol aqshaǵa aınaldyrǵan. Qylmystyq áreketter nátıjesinde bank klıentterine 60 mln teńge kóleminde zalal keltirilgen. Qylmys jasaǵannan keıin ol jasyrynyp, soǵan baılanysty halyqaralyq izdeý jarııalanǵan.

Osy jyldyń sáýir aıynda fıgýrant Krasnodar ólkesiniń aýmaǵynda ustaldy. Sodan keıin ol Qazaqstan Respýblıkasy Bas prokýratýrasynyń suraýy boıynsha Qazaqstanǵa ekstradıtsııalandy.

Qazirgi ýaqytta kúdikti ýaqytsha ustaý ızolıatoryna qamaldy. Aıyptalǵan qylmysty jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.

Aıta keteıik, osy jyly qylmystyq áreketteri 350-den astam jábirlenýshige jalpy somasy 7 mıllıard teńgege jýyq shyǵyn keltirgen alaıaqtyq jasaǵany úshin izdeýde júrgen 11 adam Reseıden Qazaqstanǵa ekstradıtsııalandy.

Buǵan deıin QMA jáne ІІM qylmystyq esirtki tabysyn zańdastyrýǵa qarsy birlesip jumys istep jatqanyn jazǵan edik.