Bankte kredıti jáne lombardta qaryzy bar azamattarǵa qandaı jeńildikter jasalady
«Kepilsiz tutynýshylyq nesıeniń shamadan tys ósýine jol bermeý boıynsha tapsyrmany iske asyrý úshin mynadaı sharalar kózdeledi: tótenshe jaǵdaı kezeńinde jáne tulǵalardyń barlyq kepilsiz tutynýshylyq qaryzy boıynsha 90 kún ótken kezde syıaqy esepteýge tyıym salynady. Budan ary atalǵan shara zańnamalyq negizde engiziledi. Jeke tulǵalardyń nesıe tarıhyn qalpyna keltirý úshin 50 paıyzdan astam merzimi ótken bereshekti 12 aıda ótegen jáne mindettemelerdi keıinnen oryndaǵan jaǵdaıda qaryz alýshy úshin jaǵymsyz nesıe tarıhyn túzetý boıynsha múmkindik kózdeledi», - dedi ol.
Mádına Ábilqasymova sonymen qatar halyq jáne bıznes úshin borysh ótemesiniń ósýine jol bermeý baǵytyndaǵy sharalardy da aıtyp ótti. Onyń aıtýynsha Qazaqstanda tótenshe jaǵdaı engizilip, ekonomıkanyń jekelegen salalaryna shekteý sharalarynyń engizilýine baılanysty halyq pen ShOB sýbektileriniń qarjylyq jaı-kúıiniń nasharlaýyna jol bermeý úshin qosymsha sharalar qabyldaý qajet. Agenttik Qazaqstan qarjygerleriniń qaýymdastyǵymen, ekinshi deńgeıli banktermen jáne nesıe naryǵyndaǵy basqa da sýbektilermen birlesip, mynadaı sharalardy pysyqtap, qoldanbaq.
«Birinshiden QR Azamattyq kodeksiniń 359-babyna sáıkes nesıe boıynsha mindettemesin oryndamaǵan qaryz alýshy asa kúrdeli, ıaǵnı tótenshe jáne toıtarýǵa bolmaıtyn mán-jaılarǵa tap bolǵan kezde múliktik jaýapkershilikti atqarmaıdy. Mundaı jaǵdaıǵa tótenshe jaǵdaı rejiminiń engizilýi de jatady. Soǵan baılanysty jeke jáne zańdy tulǵalardyń qaryzdary men mıkronesıeleri boıynsha tólemder merziminiń ótýi tótenshe jaǵdaıdyń engizilýine baılanysty týyndaǵan kezde – aıyppuldar men ósimpuldar eseptelmeýi tıis. Bul norma jeke jáne zańdy tulǵalarǵa, bankter ǵana emes lombardtardy jáne nesıelik seriktestikterdi, qaryz beretin barlyq kredıtordy qosa alǵanda barlyq mıkroqarjy uıymdary bergen qaryzdarǵa qoldanylady», - dedi ol.
