Bankrottyq týraly zań jobasyn qabyldaýǵa asyǵýdyń qajeti joq
ASTANA. QazAqparat - Bankrottyq týraly zań jobasyn qabyldaý úshin asyǵýdyń qajeti joq. Bul týraly búgin Úkimet otyrysynda QR Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.
Otyrysta QR Qarjy mınıstri Álıhan Smaıylov Elbasynyń bankrottyq jáne ońaltý salasyndaǵy qoldanystaǵy zańnamany qaıta qaraý qajettigine nazar aýdarǵandyǵyn eske saldy.
«Búginde qoldanystaǵy zańnama shyǵyndy kásiporyndardy jedel jabýǵa múmkindik bermeıdi. Negizgi sebep - sýbektini bankrot dep taný úshin onyń dármensizdigin anyqtaýǵa múmkindik beretin aıqyn uǵymdardyń bolmaýy. Tıisti zań jobasy qazirgi ýaqytta ázirlenip, Parlamenttiń qaraýyna engizildi. Qarjy mınıstrligi zań jobasyn Qazaqstan Respýblıkasy Prezıdentiniń tapsyrmasyn jáne depýtattardyń eskertýlerin eskere otyryp, qysqa merzimde pysyqtaıtyn bolady», - dep atap ótti mınıstr.
Osy oraıda Úkimet basshysy Baqytjan Saǵyntaev Bankrottyq týraly zań jobasy boıynsha asyǵýdyń qajeti joq ekendigin eskertti.
«Óıtkeni, Elbasynyń tapsyrmasy bar. Qazir búkil óńirdi aralap, ondaı kásiporyndarǵa saraptama jasap shyǵýymyz kerek. Sodan keıin sheshim qabyldaý qajet. Banktermen, Ulttyq bankpen, kásipkerlermen aqyldasyp alýymyz kerek. Al endi zań jobasy Parlamentte jatyr, tezirek ótkizip jibereıik deıtin bolsaq, sońynda odan bizge eshqandaı paıda bolmaıdy», - dedi Premer-Mınıstr.
Al Qarjy mınıstri Zań jobasy jan-jaqty qaralatyndyǵyna sendirdi.
