Bankrottyq týraly zań jobasy reıderlikke jol ashady - Atameken
ASTANA. QazAqparat - «Atameken» ulttyq kásipkerler palatasy bankrottyq jáne ońaltý rásimderin jetildirýge arnalǵan zańnmalyq ózgeristedi qoldap otyrǵan joq. Sebebi keıbir tolyqtyrýlar reıderlikke jol ashýy ábden múmkin, dep xabarlaıdy QazAqparat tilshisi.
Palatanyń zańnama departamentiniń dırektory Laýra Mersalımovanyń aıtýynsha, bankrottyq jáne ońaltý rásimderin jeńildetken durys. Alaıda keıbir ózgerister onsyz da túsiniksiz bolyp turǵan sharalardy qıyndatyp jiberýi yqtımal.
«Boryshkerdiń qaýqarsyzdyǵyna qatysty jańa anyqtama engizilip otyr. Sonyń negizinde ony bankrot retinde taný týraly sot sheshimi shyǵarylady. Qazirgi kezde sot boryshkerdiń kredıtor aldyndaǵy qaryzyn tolyǵymen jaba ala ma, joq pa, osyny zerdeleıdi. Budan bólek, jalaqy, salyq jáne taǵy basqa mindetti tólemder boıynsha esep-qısap jasalady. Al jańa normaǵa sáıkes, boryshkerdiń jalpy qaryzy onyń barlyq aktıvterinen artyq bolsa, sot óz sheshimin shyǵara beredi. Sonda qaryz aktıvten qanshaǵa artyq bolýy qajet? Zańda ol aıyrmashylyqtyń naqty kólemi kórsetilmegen. Demek, qaryzdyń somasy aktıvten sál-pál basym bolsa, kásiporyndy bankrot dep jarııalaýǵa bola ma? Ol durys emes sııaqty», - dedi L.Mersalımova Parlament Májilisinde ótken dóńgelek ústelde.
Onyń aıtýynsha, qazirgi zańnamada zań buzýshylyqtyń quramy anyq. Al jańa ózgeristerdiń saldarynan onyń sıpaty múldem túsiniksiz bolyp ketedi. Sondaı-aq, qazirgi ákimshilik quqyq buzýshylyqqa jatatyn áreketterdi qalmystyq jazanyń sanatyna aýystyrǵan orynsyz.
«Bizdińshe, jeńildetilgen lıkvıdatsııanyń jańa mexanızmi ınvestıtsııalyq klımatqa keri áserin tıgizýi múmkin. Zańsyz áreketter, reıderlikke jol berilýi yqtımal. Negizi, Qazaqstannyń 2025 jylǵa deıingi strategııalyq josparynda, kerisinshe, jeke menshik quqyǵyn kúsheıtý mindeti qoıylǵan. Al jeke menshikke kepildik berilse, reıderlik bolmaıdy», - dep atap kórsetti L.Mersalımova.
Aıta keteıik, QR Qarjy mınıstrliginiń aqparaty boıynsha elimizde 4000-ǵa jýyq bıznes sýbektisi bankrottyq rásimderden ótip jatyr. Al 400 kásiporyn ońaltýǵa ótinish bildirdi.
