Bankrottyq rásimdeýge ótinish berý naýryzda bastalady

ASTANA. QazAqparat – Elorda turǵyndarymen kezdesken Qarjy vıtse-mınıstri Erjan Birjanov bankrottyq rásimdeý úshin ótinish berý tártibin túsindirdi, dep habarlaıdy QazAqparat tilshisi.

Erjan Birjanovtyń aıtýynsha, qaryzy bar azamattar 2023 jyldyń naýryz aıynan bastap bankrottyqqa aryz bere alady. Sottan tys bankrottyq rásimdeý memlekettik kirister organdary arqyly júrgiziledi. Azamattar bul qyzmetti elektrondy nysanda «egov.kz» portaly jáne «e-Salyq Azamat» mobıldi qosymshasynyń kómegimen alýyna bolady. Keıin ótinish Memlekettik kirister komıtetiniń aqparattyq júıesine túsedi. Osy derekterdi alǵannan soń jaýapty memlekettik jáne basqa organdar boryshkerdiń bankrottyq rásimdeýge jatatyn sanatqa sáıkestigin tekseredi. Azamattyń ótinishi talaptarǵa saı kelse nemese ony quzyrly organ bankrot dep tanýdan bas tartsa, tıisti habarlama «egov.kz» portalyndaǵy «jeke kabınetine» keledi.

«Sottan tys bankrottyqty azamattar tek kelesi sharttardy oryndaı otyryp rásimdeıdi: bank, mıkroqarjy uıymdary men kollektorlar aldyndaǵy bereshek 5,5 mln teńgeden nemese 1 600 AEK-ten aspasa, ótinish bergen kúnnen bastap qatarynan 12 aı ishinde mindettemeleri ótelmegen bolsa jáne ótinish berýshiniń múlki bolmaǵan jaǵdaıda.

Boryshker áýeli bankpen bereshegi boıynsha jumys júrgizýi tıis. Sonymen qatar, bankrot dep tanylǵandarǵa bul shara tek 7 jyldan keıin ǵana qaıta qoldanylady. Bankrottyq 6 aı ishinde ataýly áleýmettik kómek alatyn azamattarǵa jáne 5 jyldan astam ýaqyt qaryzy ótelmegen azamattarǵa rásimdeledi», - dedi Erjan Birjanov.

Qaryzy 5,5 mln teńgeden asatyn boryshkerler sot bankrottyǵyna júgine alady. Eger jalǵyz turǵyn úı kepil zaty retinde qaralsa, onda kredıtor ony qaıtaryp alýǵa quqyly. Al, jalǵyz baspana kepil bolmasa, kredıtorlar ony talap ete almaıdy. Qalǵan ótelmegen soma, eger tóleýge múmkindigi joq boryshker bolmasa, esepten shyǵarylýy tıis.

Úshinshi rásim – tólem qabiletin qalpyna keltirý. Turaqty tabys bolǵan jaǵdaıda qaryzdy tóleý úshin 5 jylǵa deıin sot tártibimen bólip tóleý múmkindigin alýǵa bolady. Bul protsedýra qarjy basqarýshymen birlese ázirlenip, sotta bekitiledi. Atalǵan mehanızmniń artyqshylyǵy – adamǵa «bankrot» mártebesi berilmeıdi. Tıisinshe, bankrot úshin kózdelgen saldar oǵan qoldanylmaıdy.