Bankrottyq máseleler boıynsha Parlamenttegi zań jobasy jumys oryndaryn barynsha saqtap qalýdy kózdeıdi
ASTANA. QazAqparat - Bankrottyq máseleler boıynsha ázirlengen zań jobasy bankrot bolyp talynylǵan bıznesti saqtap qalýdyń jańa múmkindikterin engizýdi qarastyrady. Bul týraly búgin Astanada ótken baspasóz máslıhatynda QR QM MKK Salyqtyq baqylaý departamenti Bereshektermen jumys basqarmasynyń bas sarapshysy Merýert Sısembaeva málim etti.
«Búginde Parlament Májilisimen «Qazaqstan Respýblıkasynyń keıbir zańnamalyq aktilerine ońaltý jáne bankrottyq máseleleri boıynsha ózgerister men tolyqtyrýlar engizý týraly» zań jobasy qaralýda. Bul qujat bankrot bolyp talynylǵan bıznesti saqtap qalýdyń jańa múmkindikterin engizýdi qarastyrady», - dedi sarapshy. Onyń sózine qaraǵanda, bul baǵytta bankrottyqtyń kez kelgen satysynda taratylýdan ońaltýǵa kóshý múmkindigi, boryshker men kredıtor arasynda bitimgershilik kelisimdi jasasý, bankrottyń kompanııasyn satý men menshik ıesin aýystyrý sekildi balamaly tásilderdi engizý kózdelgen. «Bankrottyqtyń aldyn alý maqsatynda jańa tetik usynylady, ıaǵnı ol barlyq boryshtar boıynsha turaqsyzdyq aıybyn jáne syıaqyny esepke jazýdy toqtatýmen boryshker men kredıtor arasyndaǵy úsh jyldyq kelisim negizinde tólem qabiletsizdigin retteý eskerilgen. Sonymen qatar, zań jobasy ońaltý rásimi qoldanylǵan nemese bankrot dep tanylǵan boryshkerge qatysty daýlardy qaraý bir sýdıaǵa belgileýdi jáne apellıatsııalyq satyda sot aktilerine shaǵymdanýdy shekteýdi kózdeıdi. Zań jobasyn iske asyrý árekettegi óndiristi, jumys oryndaryn barynsha saqtap qalý, sondaı-aq ońaltý jáne bankrottyq rásimderin ótkizý merzimderin qysqartýdy qamtamasyz etýge yqpalyn tıgizedi»,- dedi S. Sısembaeva.
