Bankrottyqty rásimdeý protsesi jeńildetildi
ASTANA. KAZINFORM — Qazaqstanda bankrottyq rásimderi tolyqtaı tsıfrlyq formatqa jaqyndap keledi, dep habarlaıdy Memlekettik kirister komıtetiniń baspasóz qyzmeti.
Vedomstvo jeke tulǵalardyń, jeke kásipkerlerdiń jáne zańdy tulǵalardyń bankrottyq rásimderin jetildirýdi jalǵastyryp, olardy barlyq qatysýshy úshin neǵurlym yńǵaıly, ashyq jáne qoljetimdi etýge baǵyttalǵan jumystar júrgizip keledi.
Buryn bankrottyq máseleleri boıynsha kóptegen qujat pen ótinishti qaǵaz túrinde nemese ártúrli aqparattyq júıeler arqyly joldaý qajet bolsa, búgingi kúni protsesterdiń basym bóligi elektrondyq formatqa kóshirildi.
2024 jylǵy qazan aıynan bastap zańdy tulǵalar men jeke kásipkerlerdiń ońaltý jáne bankrottyq rásimderi Salyq tóleýshiniń kabıneti arqyly tsıfrlyq formatta qoljetimdi boldy. Bul rásim ákimshileri, kredıtorlar jáne memlekettik kirister organdary arasyndaǵy ózara is-qımyldy aıtarlyqtaı jeńildetýge múmkindik berdi.
2026 jyldyń basynan bastap qosymsha elektrondyq servıster engizildi:
- bankrottyq rásimder boıynsha habarlandyrýlardy avtomattandyrylǵan túrde qabyldaý jáne jarııalaý;
- ońaltý jáne bankrottyq rásimderiniń barysy týraly ózekti aqparatty alý múmkindikterin keńeıtý;
- boryshkerlerge qatysty qoldanylyp jatqan rásimder boıynsha málimetterge elektrondyq qoljetimdilikti qamtamasyz etý.
— Jańa tsıfrlyq sheshimder tájirıbede belsendi túrde qoldanylyp keledi. Tek 2025 jyldyń ishinde rásim ákimshileri ońaltý jáne bankrottyq rásimderiniń barysy týraly 3 myńnan astam ózekti málimetti ornalastyrǵan. Jeke tulǵalardyń bankrottyq rásimderin jetildirý jumystary da jalǵaady. Qoldau júıesinde kredıtorlar úshin memlekettik kirister organdarynyń sheshimderine kelispegen jaǵdaıda shaǵymdardy elektrondyq formatta berý múmkindigi iske asyryldy, — delingen habarlamada.
Sonymen qatar, Komıtet bankrottyq rásimderine qatysýshylarmen túsindirý jumystaryn turaqty túrde júrgizip keledi. Ótkizilgen kezdesýler men konsýltatsııalardyń nátıjesinde negizsiz ótinishter sany edáýir azaıyp, azamattardyń máselelerin qaraý merzimderi qysqaryp, ózara is-qımyl tıimdiligi artty.
Júrgizilip jatqan tsıfrlandyrý aqparat almasý merzimderin qysqartýǵa, qaǵaz túrindegi qujat aınalymyn azaıtýǵa, memlekettik qyzmetterdiń qoljetimdiligin arttyrýǵa jáne bankrottyq rásimderin barlyq qatysýshylar úshin neǵurlym ashyq ári yńǵaıly etýge múmkindik beredi.
Buǵan deıin MKK bankrottyq rásiminde azamattarǵa qandaı shyǵyndar júktelgenin túsindirdi.
