Bankrottyq boıynsha 86 myń ótinim kelip tústi – Qarjy mınıstrligi
ASTANA. KAZINFORM – Sottan tys bankrottyqty qoldaný úshin 84 myńǵa jýyq adam júgindi. Bul týraly Senatta ótken jıynda depýtat Sultanbek Mákejanov aıtty.
Depýtat zańda sottan tys jáne sot arqyly bankrottyq, sondaı-aq tólem qabilettigin qalpyna keltirý rásimi qamtylǵanyn eske saldy.
«Bul úsh rásim boryshkerlerden ótinish bolǵanda ǵana bastalatyny belgili. Qazir sottan tys bankrottyqty qoldaný úshin 84 myńǵa jýyq adam júginse, sot bankrottyǵy rásimine 2 myńǵa jýyq adam ótinish bergen. Al tólem qabilettigin qalpyna keltirý rásimi 4 adamǵa ǵana qoldanylyp jatyr», - dedi S. Mákejanov.
Onyń aıtýynsha, tıisti taldaý jumystary aıasynda azamattarǵa bankrottyq nemese tólem qabilettigin qalpyna keltirý rásimderin paıdalanýǵa kedergi jasaıtyn birqatar problema men zańnamalyq kemshilikter anyqtaldy. Birinshiden, kredıtorlar men kollektorlar kredıttik bıýroǵa boryshkerler týraly qısynsyz derekter usynǵan. Ekinshiden, Qarjy naryǵyn retteý jáne damytý agenttiginiń qalyptastyrǵan kredıtorlar tiziminde keıbir qarjy uıymdary qamtylmaǵan.
Óz kezeginde Qarjy mınıstrligi Memlekettik kirister komıteti tóraǵasynyń orynbasary Qaırat Mııatov jalpy 86 myń ótinim kelip túskenin rastady.
«Sonyń arasynda 67 myń ótinishke qoldaý jasalmady. Azamattardyń 60 paıyzǵa jýyǵynda qaryz somasy boıynsha sáıkestik bolmaǵan jáne qaryzdy tólemeý merzimi 12 aıdan aspaǵan. Ekinshi sebebi – bank mekemelerimen nemese mıkroqarjy uıymdarymen arada qaryzdy retteý týraly qujattar bolmady, ıaǵnı mundaı jaǵdaılar shamamen 30 paıyzǵa jýyqtady. Sonymen qatar, qalǵan jeke tulǵalarda nemese olardyń áıelderiniń menshiginde múlki bar ekeni anyqtaldy, bul óz kezeginde ótinishterin qabylmaýǵa negiz boldy», - dedi Q. Mııatov.
Onyń sózine qaraǵanda, qazir 9 841 adam bankrot dep tanylǵan, qaryz somasy 20 mlrd teńgege jýyqtady.
Atap aıtqanda, 2023 jyly 3 naýryzdan bankrottyqqa ótinim qabyldaý bastalady.
