Bankrotqa ushyraǵan Silicon Valley bankin básekelesi satyp aldy

ASTANA. QazAqparat – Bankrotqa ushyraǵan amerıkalyq Silicon Valley Bank (SVB) bankiniń aktıvteri men nesıelerin básekeles First Citizens BancShares banki satyp aldy, dep habarlaıdy QazAqparat VVS-ge silteme jasap.

SVB kúıreýi naýryzdyń basynda basqa da nesıe uıymdarynyń turaqtylyǵyna qaýip tóndirdi. Saldarynan álem boıynsha bank aktsııalary aıtarlyqtaı arzandady.

Dúısenbi kúngi bırja saýdasynda bank sektorynyń aktsııalary ósip jatqanyna qaramastan naryq áli de alańdap tur.

Sılıkon alqaby startaptarynyń aýqymdy bóligin nesıelegen SVB birneshe aıdan beri qıyn kezeńderdi bastan ótkerdi: durys basqarmaý men tehnologııalyq sektordaǵy jalpy jaǵdaı da oǵan áser etti.

Bank eseptik mólsherleme kóterilgennen keıin baǵasy ózgergen aktıvterin – úkimettik qundy qaǵazdardy satýdan keıin bolǵan shyǵynyn jabýǵa 2,25 mlrd dollar taba almady.

Al banktiń tolyq kúıreýine bank run – klıentterdiń qashýy sebep boldy. Túrli sebeptermen SVB klıentteri jappaı aqshalaryn shyǵaryp ala bastaǵan.

AQSh depozıtterdi saqtandyrý Federaldyq korporatsııasy jarııalaǵan SVB-ti jutý týraly kelisimge sáıkes, SVB-tiń burynǵy 17 bólimshesiniń bári dúısenbiden bastap First Citizens brendimen ashylady.

SVB klıentterine First Citizens Bank-ten shoty tolyqtaı aýdaryldy degen habarlama kelgenge deıin óz bólimshesiniń qyzmetin paıdalaný usynyldy.

Korporatsııa SVB bankrottyǵy óziniń saqtandyrý qoryna 20 mlrd dollarǵa shyqqanyn málimdedi.

SVB bankrottyǵynan keıin onyń brıtandyq bólimshesin HSBC banki sımvolıkalyq bir fýntqa satyp aldy.

Buǵan deıin AQSh-tyń iri banki Silicon Valley-diń bankrotqa ushyraǵanyn habarlaǵan bolatynbyz.