Bankrot kásiporyndardaǵy jalaqy bereshegi 53,7 mln teńgege jetti
ASTANA. KAZINFORM — Qazaqstanda bankrottyq nemese ońaltý rásiminde turǵan kásiporyndardaǵy jalaqy bereshegi 53,7 mln teńgeni qurap otyr. Bul týraly QR Eńbek jáne halyqty áleýmettik qorǵaý mınıstrliginiń Memlekettik eńbek ınspektsııasy komıtetiniń Astana qalasy boıynsha departamentiniń basshysy Erlan Ismaǵulov málimdedi.
Onyń aıtýynsha, qazirgi kezde mundaı kásiporyndardaǵy 169 qyzmetkerdiń eńbekaqysy ýaqytynda tólenbegen.
— Jalaqy bereshegin óteý «Reabılıtatsııa jáne bankrottyq týraly» zańǵa sáıkes konkýrstyq basqarýshylar arqyly júzege asyrylady. Bul úderis QR Qarjy mınıstrliginiń Memlekettik kirister departamentiniń baqylaýynda, — dedi Erlan Ismaǵulov.
Onyń aıtýynsha, jalaqy bereshegin azaıtý baǵytynda júıeli jumys júrgizilip, oń nátıje baıqalyp otyr.
— 2026 jyldyń basynan beri 88,1 mln teńge jalaqy qaryzy ótelip, 158 jumyskerdiń eńbek quqyqtary qorǵaldy. Máselen, 2025 jyly 215,3 mln teńgeden astam bereshek ótelip, 1007 jumyskerdiń quqyǵy qalpyna keltirilse, 2024 jyly 165 mln teńgeden astam jalaqy qaryzy jabylyp, 1350 adam qamtylǵan, — dedi departament basshysy.
Sonymen qatar, eńbek zańnamasynyń saqtalýyn qamtamasyz etý maqsatynda baqylaý sharalary da kúsheıtilgen.
— Jyl basynan beri memlekettik eńbek ınspektorlary 3 636 azamattyń ótinishin qarap, 91 jospardan tys tekserý júrgizdi. Nátıjesinde 46 nusqama berilip, 43 jeke jáne zańdy tulǵa ákimshilik jaýapkershilikke tartyldy. Jalpy somasy 8,5 mln teńge aıyppul salyndy, — dedi departament basshysy.
Al ótken jyldardyń kórsetkishterine kelsek, 2025 jyly 10 867 ótinish qaralyp, 567 tekserý júrgizilgen. Sonyń nátıjesinde 327 nusqama berilip, 39,3 mln teńge aıyppul salynǵan. 2024 jyly 322 tekserý júrgizilip, 6 myńnan astam ótinish qaralǵan.
Aıta keteıik, buǵan deıin Astanada 4 kásiporynda 22,2 mln teńge jalaqy bereshegi anyqtalǵany habarlanǵandy.
