Bankrot bolsa, qaryzy keshiriledi degen qate túsinik – mınıstrlik

ASTANA. QazAqparat – QR Qarjy mınıstrligi jeke tulǵalardyń bankrottyq jarııalaý protsesin taǵy bir túsindirdi, dep habarlaıdy QazAqparat tilshisi.

«Qazaqstan Respýblıkasy azamattarynyń tólem qabiletin qalpyna keltirý jáne bankrottyq týraly» zań jobasyn keıbir otandastarymyz durys túsinbeı jatqan sekildi. Bankrot mártebesin alsa, qaryzy keshiriledi degen túsinik bar. Ol qate túsinik. Buǵan deıin bankrot bolýdyń saldaryn aıtyp kettim. 5 jylǵa deıin nesıe, basqa da qaryz ala almaıdy. Jeke tulǵanyń qarjylyq jaǵdaıyna monıtorıng júrgiziledi. Sondyqtan bankrot bolýdyń saldaryn umytpaǵan jón. Óz kezeginde jańa zańnamany halyqqa keńinen túsindirý jumysyn jalǵastyramyz», - dedi QR Qarjy vıtse-mınıstri Erjan Birjanov Senatta ótken dóńgelek ústel barysynda.

Sondaı-aq, vıtse-mınıstr sot arqyly ózin bankrot dep jarııalaýdyń nemen aıaqtalatynyn aıtty.

«Sottyń sheshimine sáıkes, bankrot bolǵan boryshkerdiń mindetin óteý merzimi ótken dep sanalady. Kredıtorlar boryshkerden qaryzyn óteýin talap ete almaıdy. Boryshkerge aıyppul salý jáne syıaqy esepteý avtomatty túrde toqtatylady. Árıne, bankrot bolǵan boryshkerge nesıe alý, kepil qoıý jáne ózdiginen mámile jasaýǵa tyıym salynady», - deıdi ol.

Buǵan deıin Erjan Birjanov elimizde nesıe jáne basqa da qaryzyn tólemeı júrgen 7 mln boryshker baryn aıtty.