Bankrot bolǵan bıznesmen Máskeý ortalyǵyndaǵy bankti basyp aldy
ASTANA. QazAqparat - Sársenbi keshke qaraı belgisiz er adam Máskeý ortalyǵyndaǵy «Sıtıbankti» basyp aldy. Ol tórt adamdy kepilge alyp, bólimsheni jaryp jiberetindigin aıtyp, polıtsııamen kelissóz júrgizýdi talap etti, dep habarlaıdy reseılik RIA Novostı agenttigi.
Kásipker ǵalamtorda Reseı prezıdentine vıdeo úndeýin jarııa etti, onda ol óziniń zań buzýǵa ne májbúr etkenin aıtyp ótken.
Onyń keýdesinde jarylǵyshqa uqsaıtyn qorap bar. Oqıǵa ornyna ІІM basshysy MVD Vladımır Kolokoltsev pen astanalyq Tergeý komıtetiniń jetekshisi Aleksandr Drymanov kelip jetken. Tergeý komıteti adamdardy kepilge alý boıynsha is qozǵady. Bank turǵan kóshe jabylyp, onda arnaıy jasaq jáne saperler tartyldy.
Kelissózderden keıin er adam eki kepilge alynǵan adamdy bosatty, keıin taǵy biri syrtqa shyqty.
Derekkózderdiń habarlaýynsha bankti Aram Petrosıan atty bankrot bolǵan kásipker basyp alǵan.
Oqıǵaǵa kýá bolǵandardyń habarlaýynsha, ol bankke tústen keıin kelip óziniń josparyn málim etken. «Er adam tústen keıin bankte otyrǵan. Ol qyzmetkerdiń birine kelip esep shot ashqysy keletindigin sondvqtan bank basqarýshysyn shaqyrýdy talap etken. Budan soń ol banktiń qyzmetine qarsy emestigin, oǵan aqsha alýdyń qajeti joqtyǵyn, tek bankti basyp alatyndyǵyn jetkizgen», - dep atap ótken derekkóz.
© Foto: "Moskva" agenttigi/Nıkerıchev Andreı
